जळगाव तालुक्यात रायपुर फाट्यावर झाला होता अपघात
जळगाव ( प्रतिनिधी ) – तालुक्यातील रायपूर फाट्यावर २ दिवसांपूर्वी झालेल्या भीषण अपघातात एका तरुणाचा उपचारादरम्यान मृत्यू झाला आहे. विरुद्ध दिशेने आलेल्या भरधाव दुचाकीने दिलेल्या धडकेमुळे हा अपघात झाल्याची प्रथम माहिती मिळाली आहे. याप्रकरणी एमआयडीसी पोलीस स्टेशनला गुन्हा दाखल करण्यात आला आहे.
सुनील भिका बनसोडे (वय ३८, रा. रायपूर ता. जळगाव) असे मयत तरुणाचे नाव आहे. तो आई, पत्नी, दोन मुले यांच्यासह राहत होता. सेंट्रींग काम करून तो परिवाराचा उदरनिर्वाह करीत होता. दरम्यान गुरुवारी दि. २ ऑक्टोंबर रोजी दुपारी सुनील बनसोडे हे पत्नी आणि मुलासह रायपुर गावातून बाहेर जात असताना विरुद्ध दिशेने येणाऱ्या भरधाव दुचाकीने त्यांना धडक दिली या धडके सुनील बनसोडे हे गंभीर जखमी झाले होते. तर त्यांची पत्नी व मुलगा हे किरकोळ जखमी झाले होते.
सुनील बनसोडे यांच्यावर खाजगी रुग्णालयात उपचार सुरू असताना शनिवार दि. ४ ऑक्टोबर रोजी त्यांचा सकाळी मृत्यू झाला. पुढील कार्यवाहीसाठी त्यांचा मृतदेह शासकीय वैद्यकीय महाविद्यालय व रुग्णालयात दाखल करण्यात आला. यावेळी कुटुंबीयांनी रुग्णालयात एकच आक्रोश केला होता. घटनेप्रकरणी एमआयडीसी पोलीस स्टेशनला गुन्हा दाखल करण्यात आला आहे. तरुणाचा मृत्यूमुळे रायपूर गावावर शोककळा पसरली आहे.
