मुक्ताईनगर तालुक्यातील खामखेडा येथे घटना
मुक्ताईनगर (प्रतिनिधी) : तालुक्यातील खामखेडा येथील बुऱ्हानपूर रोडवर झालेल्या भीषण अपघातात ५० वर्षीय इसमाचा जागीच मृत्यू झाला आहे. हा अपघात गुरुवारी दि. २ ऑक्टोबर रोजी रात्री साडेसातच्या सुमारास घडला. मुक्ताईनगर पोलीस ठाण्यात फिर्याद दाखल असून, पोलिसांनी गुन्हा दाखल केला आहे.
मयत राजू रामभाऊ वाघ (वय ५०, रा. खामखेडा) हे रात्री खामखेडा येथील बस स्टॉपजवळ रस्ता ओलांडत होते. त्याचवेळी बाळू बुधा भोई (वय २८, रा. मेळसांगवे) यांच्या ताब्यातील काळ्या रंगाच्या बजाज पल्सर (क्र. एमएच १९ ईएन ६६३०) या दुचाकीने त्यांना जोरदार धडक दिली. या धडकेत राजू वाघ यांच्या डोक्याला गंभीर मार लागून त्यांचा जागीच मृत्यू झाला. या अपघातानंतर परिसरात मोठी गर्दी जमली. घटनास्थळावरून नागरिकांनी तात्काळ पोलिसांना माहिती दिली. या प्रकरणी अरुण रामभाऊ वाघ (रा. खामखेडा) यांनी मुक्ताईनगर पोलीस ठाण्यात फिर्याद दिली असून, पोलिसांनी गुन्हा दाखल केला आहे. पुढील तपास पोलीस निरीक्षक आशिष अडसूळ यांच्या मार्गदर्शनाखाली पोलीस नाईक पवन सपकाळ करीत आहे.
