वैजापूर-खा-यापाडा रोडवर भीषण अपघात
चोपडा (प्रतिनिधी) :- तालुक्यातील वैजापूर ते खा-यापाडा रोडवर झालेल्या मोटारसायकल अपघातात ३४ वर्षीय तरुणाचा दुर्दैवी मृत्यू झाला. लेदा सिताराम पावरा (वय ३४, रा. निमदया, ता. रावेर, जि. जळगाव) असे मृत तरुणाचे नाव असून, या घटनेमुळे परिसरात हळहळ व्यक्त होत आहे.
लेदा पावरा हे आपल्या दुचाकीने वैजापूरकडून खायापाडाकडे जात असताना त्यांचा अपघात झाला. या अपघातात त्यांच्या डोक्याला गंभीर दुखापत झाल्याने ते घटनास्थळीच रक्ताच्या थारोळ्यात पडले होते. त्यांच्या नातेवाईकांनी त्यांना तातडीने चोपडा येथील उपजिल्हा रुग्णालयात हलवले, मात्र डॉक्टरांनी तपासणी अंती त्यांना मृत घोषित केले. घटनेची माहिती मिळताच चोपडा ग्रामीण पोलिसांनी रुग्णालयात धाव घेतली. पोलीस निरीक्षक महेश टाक यांच्या मार्गदर्शनाखाली या प्रकरणाची अकस्मात मृत्यूची नोंद करण्यात आली असून, पुढील तपास पोलीस नाईक संदीप नन्नवरे करत आहेत.
