अमळनेर रस्त्यावर बहादरवाडी फाट्याजवळ जबर अपघात
अमळनेर (प्रतिनिधी) :- तालुक्यातील पारोळा रस्त्यावर बहादरवाडी फाट्याजवळ वळणावर दोन दुचाकींची समोरासमोर जोरदार धडक होऊन एकाचा पाय मोडला जाऊन मोटरसायकलमध्ये हाड अडकून पडल्याची घटना दि. ४ रोजी सायंकाळी सव्वा पाच वाजेच्या सुमारास घडली.याप्रकरणी अमळनेर पोलीस स्टेशनला गुन्हा दाखल करण्याचे काम सुरु होते.
भरत चौधरी (रा. पारोळा) हा दुचाकी क्रमांक (एमएच १२ एफएन ३६१) वर मुलगी व पत्नीसह मंगळदेवग्रह मंदिरावर दर्शनासाठी येत होता. तर छोटू भिल (रा. सडावण) हा डबलशीट अमळनेरहुन मोटरसायकल क्रमांक (एमएच १९ डी ५५८१) वर सडावण कडे जात असताना बहदरवाडी फाट्याजवळ दोघांची समोरासमोर धडक झाली. त्यात भरत चौधरी याचा पाय मोडून पायाचे हाड मोटरसायकलच्या टूल बॉक्सच्या प्लास्टिक मध्ये अडकले.
त्याला तातडीने पारोळा येथे रवाना करण्यात आले तर छोटू भिल हा देखील जखमी झाल्याने त्याला अमळनेर येथे खाजगी दवाखान्यात दाखल करण्यात आले. घटनास्थळी हेडकॉन्स्टेबल उदय बोरसे, मिलिंद सोनार, विनोद संदानशिव, चरण पाटील, सुनील पाटील यांनी भेट देऊन पंचनामा केला. जखमींना उपचारासाठी रवाना केल्यावर दुचाकी अमळनेर पोलीस स्टेशनला जमा करण्यात आल्या.
