जिल्हापेठ पोलिसांची यशस्वी कामगिरी
जळगाव (प्रतिनिधी) : येथील जिल्हापेठ पोलिसांनी मोटारसायकल चोरीच्या एका गुन्ह्यात मध्यप्रदेशमधील एका आरोपीला अटक केली आहे. आरोपीकडून चोरीला गेलेली मोटारसायकल जप्त करण्यात आली आहे.
जिल्हापेठ पोलीस स्टेशनमध्ये ३१ ऑगस्ट २०२५ रोजी मोटारसायकल चोरीचा गुन्हा दाखल करण्यात आला होता. या गुन्ह्याचा तपास करत असताना, पोलीस पथकाला गुप्त माहिती मिळाली की, विनेश बरडे नावाचा एक संशयित व्यक्ती सध्या चिंचोली, कुसुंबा परिसरात राहत आहे. त्याने मेंहदी रंगाचा शर्ट आणि निळ्या रंगाची जीन्स परिधान केली असून तो डी-मार्टजवळ उभा असल्याची माहिती पोलिसांना मिळाली. जिल्हापेठ पोलिसांच्या गुन्हे शोध पथकाने तात्काळ डी-मार्टजवळ जाऊन तपास केला. दिलेल्या वर्णनानुसार संशयित व्यक्ती मिळून आल्याने त्याला ताब्यात घेण्यात आले. चौकशीदरम्यान त्याने आपले नाव विनेश चंपालाल बरडे (वय ३०, रा. अंजनगाव, ता. सेंधवा, जि. बडवाणी, मध्यप्रदेश, ह.मु. कुसुंबा, जळगाव) असे सांगितले.
त्यानंतर तपास अधिकारी, पोलीस हवालदार शरीफ शेख यांनी आरोपीला अटक केली. न्यायालयाने आरोपीला दोन दिवसांची पोलीस कोठडी सुनावल्यानंतर पोलिसांनी त्याच्याकडून चोरीस गेलेली मोटारसायकल हस्तगत केली आहे. ही कारवाई पोलीस अधीक्षक डॉ. महेश्वर रेड्डी, अपर पोलीस अधीक्षक अशोक नखाते, उपविभागीय पोलीस अधिकारी नितीन गणापुरे आणि पोलीस निरीक्षक प्रदीप ठाकूर यांच्या मार्गदर्शनाखाली करण्यात आली. यामध्ये पोलीस हवालदार महेश महाजन, नरेश सोनवणे, शरीफ शेख, तेजस मराठे, अमितकुमार मराठे, प्रशांत सैदाणे, विकास पहुरकर, आणि प्रशांत लाड यांचा समावेश होता.
