जळगाव तालुक्यात रामदेववाडी येथे घडली होती घटना
जळगाव (प्रतिनिधी) :- तालुक्यातील रामदेववाडी येथील दुचाकी अपघातात जखमी झालेल्या ३५ वर्षीय महिलेचा उपचारादरम्यान मृत्यू झाल्याची घटना १८ सप्टेंबर रोजी दुपारी ३ वाजता घडली होती. याप्रकरणी चौकशी अंती गुरूवारी २६ सप्टेंबर रोजी दुपारी ४ वाजता एमआयडीसी पोलीस ठाण्यात अकस्मात मृत्यूची नोंद करण्यात आली आहे.
मंजुळाबाई संजय राठोड (वय ३५ रा. रामदेववाडी ता.जळगाव) असे मयत महिलेचे नाव आहे. रामदेववाडी येथे मंजुळाबाई संजय राठोड या परिवारासह वास्तव्याला होत्या. दि. ५ सप्टेंबर रोजी दुपारच्या सुमारास मंजुळाबाई राठोड ह्या पुतण्या निलेश राठोड याच्यासोबत दुचाकीवर बसून नेरीकडून रामदेवावाडी येथे येत असतांना त्यांच्या रस्त्यावर कुत्रे आडवे आले. त्यामुळे त्यांची दुचाकी घसरली. या अपघातात मंजुळाबाई यांच्या डोक्याला गंभीर दुखापत झाली.
त्यांना जळगाव येथील शासकीय वैद्यकीय महाविद्यालयात उपचारार्थ दाखल करण्यात आले. त्यांच्यावर उपचार सुरू असतांना दि. १८ सप्टेंबर रोजी दुपारी ३ वाजेच्या सुमारास त्यांचा उपचारादरम्यान मृत्यू झाला. याबाबत चौकशीअंती अखेर गुरूवारी दि. २६ सप्टेंबर रोजी दुपारी ४ वाजता एमआयडीसी पोलीसात अकस्मात मृत्यूची नोंद करण्यात आली. पुढील तपास पोलीस उपनिरीक्षक राजेंद्र उगले हे करीत आहे.
