धरणगाव तालुक्यात पाळधी बायपासजवळ घडली होती घटना
जळगाव (प्रतिनिधी) : धरणगाव तालुक्यातील पाळधी बायपासजवळ मंगळवारी दि. २२ एप्रिल रोजी दुपारी २ दुचाकींची समोरासमोर भीषण धडक झाली होती. या धडकेत एक तरुण गंभीर जखमी झाला होता. त्याच्यावर अतिदक्षता विभागात उपचार सुरु असताना शुक्रवारी सकाळी त्याचा मृत्यू झाला आहे. याप्रकरणी नशिराबाद पोलीस स्टेशनला घटनेची नोंद घेण्यात आली आहे.
उपरसिंग करमसिह बारेला (वय २१, रा. झिरपन ता. वरला जि. मध्यप्रदेश, ह. मु. पिंप्री ता. धरणगाव) असे मयत तरुणाचे नाव आहे. त्याच्या पश्चात आई, वडील, पत्नी, ४ मुले असा परिवार आहे. मजूरी काम करून तो परिवाराचा उदरनिर्वाह करीत होता.(केसीएन)जळगाव शहरातील पिंप्राळा भागातील रहिवासी बापुराव महादु पाटील (वय ५२) हे पत्नी संगीता बापुराव पाटील (वय ४५) यांच्यासोबत पाळधी येथून दुचाकीने जळगावकडे येत होते. त्यावेळी पाळधीहून धरणगावकडे जाणाऱ्या उपरसिंहच्या दुचाकीची बापूराव पाटील यांच्या दुचाकीला समोरासमोर जोरदार धडक लागली.
हा अपघात पाळधी बायपासजवळ मंगळवारी २२ एप्रिल रोजी दुपारी १ वाजेच्या सुमारास घडला होता. या भीषण अपघातात बापुराव पाटील व त्यांची पत्नी संगिता पाटील हे जखमी झाले तर समोरील दुचाकीवरील मगन पुन्या बारेला (वय २५) आणि उपरसिंग करमसिह बारेला (वय २१ दोन्ही रा. मध्यप्रदेश, ह. मु. पिंप्री ता. धरणगाव) हे दखील जखमी झाले.(केसीएन)यातील उपरसिंग यांची प्रकृती चिंताजनक असल्याने त्यांला अतिदक्षता विभागात दाखल करण्यात आले होते. तर पुढील उपचारासाठी जळगाव खुर्द येथील खाजगी रुग्णालयात तो ३ दिवसांपासून दाखल होता. उपचार सुरु असताना त्याचा शुक्रवारी सकाळी ९ वाजेच्या सुमारास मृत्यू झाला आहे. याप्रकरणी नशिराबाद पोलीस स्टेशनला अकस्मात मृत्यूची नोंद करण्यात आली आहे. या अपघातात पाळधी दूरक्षेत्र पोलीस स्टेशनला नोंद घेण्याचे काम सुरु होते.
