जळगाव ( प्रतिनिधी ) – आकाशवाणी चौक परिसरातील दोन ठिकाणी चोरट्यांनी बंद घराचे कुलूप तोडून अंगठी आणि रोकड असा दीड लाख रूपयांचा ऐवज लंपास केल्याचा प्रकार ८ नोव्हेंबररोजी सकाळी उघडकीला आला. प्रसाद काळे यांच्या फिर्यादीवरून जिल्हापेठ पोलीसात अज्ञात व्यक्तीविरोधात गुन्हा दाखल करण्यात आला आहे.
प्रसाद यशवंत काळे ( वय-४७ , रा. आसोदा ता. जि.जळगाव ह.मु. गणेश नगर, आकाशवाणीच्या मागे जळगाव) हे कुटुंबियांसह वास्तव्याला आहे. ते जैन कंपनीत नोकरीला आहे. दिवाळीनिमित्त घरातील सदस्य गावाला गेले होते. प्रसाद काळे यांची कंपनीत रात्रपाळी असल्याने ते ७ नोव्हेंबर रोजी रात्री ११ वाजता घराला कुलूप लावून कामाला निघून गेले. मध्यरात्री अज्ञात चोरट्यांनी बंद घराचे कुलूप तोडून घरातील कपाटातील सोन्याची अंगठी आणि रोकड असा एकुण ७० हजाराच्या मुद्देमालाची चोरी केली. हा प्रकार ८ नोव्हेंबर रोजी सकाळी उघडकीला आला. त्यांच्या गल्लीत राहणारे सुभाष अरूण पाटील यांचे देखील बंद घर फोडून घरातील ८० हजार रूपयांचे दागिने लांबविल्याचे समोर आले आहे.
प्रसाद काळे यांच्या फिर्यादीवरून जिल्हापेठ पोलीस ठाण्यात अज्ञात चोरट्यांविरोधात गुन्हा दाखल करण्यात आला आहे. पुढील तपास पो उ नि प्रदीप चांदेलकर करीत आहेत.
