धरणगाव तालुक्यातील गारखेडा रस्त्यावरील घटना
धरणगाव (प्रतिनिधी) :- दुचाकीच्या समोरासमोर झालेल्या धडकेत जखमी झालेल्या गारखेडा येथील अल्पवयीन मुलाचा जळगाव येथे उपचार घेत असताना मृत्यू झाला. अपघाताची घटना सोमवारी सायंकाळी गारखेडा-धरणगाव रस्त्यावर घडली.
सोमवारी सायंकाळी साडेसात वाजण्याच्या सुमारास मित्राचा वाढदिवस असल्याने मयत प्रथमेश सुधाकर पाटील (गारखेडे), तसेच वैभव विठ्ठल देशमुख (अनोरे), हितेश भगवान भोई (अनोरे), शिवराज पंकज पाटील (गारखेडे) हे इयत्ता नववीत शिकणारे चौघे मित्र धरणगाव येथे केक घेण्यासाठी दुचाकी क्रमांक (एम.एच.१९, बी.सी. ८३५५) ने धरणगावकडे निघाले होते. त्यांची धडक समोरून येणाऱ्या दुचाकी क्रमांक (एम.एच. १९, ए.बी. ७०९८) सोबत झाली. या दुचाकीवरून शेखर जितेंद्र महाजन (१९) आणि गायत्री जितेंद्र महाजन (२८) हे भाऊ-बहीण अनोरेकडे जात होते.
या अपघातात प्रथमेश पाटील हा गंभीर जखमी झाला. त्याचा उपचारादरम्यान जळगाव येथे मृत्यू झाला. त्याच्यावर गारखेडा येथे दुपारी तीन वाजण्याच्या सुमारास शोकाकुल वातावरणात अंत्यसंस्कार करण्यात आले. इतर पाच जखमींवर जळगाव येथे उपचार सुरू आहेत. धरणगाव पोलीस स्टेशनला घटनेची नोंद घेण्याचे काम सुरू होते.
