जामनेर जळगाव रोडवर घटना
जामनेर (प्रतिनिधी) : जळगाव-जामनेर रस्त्यावरील हॉटेल शशीप्रभाजवळ दोन दुचाकींच्या झालेल्या धडकेत ६५ वर्षीय वृद्ध गंभीर जखमी झाले आहेत. चुकीच्या दिशेने भरधाव येणाऱ्या दुचाकी चालकाने धडक दिल्याने हा अपघात झाला असून, याप्रकरणी जामनेर पोलीस ठाण्यात गुन्हा दाखल करण्यात आला आहे.
फिर्यादी माधव हरी रजपूत (वय ६५, रा. जामनेर पुरा, सध्या रा. नवसारी, गुजरात) हे त्यांच्या मालकीच्या रॉयल एनफिल्ड दुचाकीने (क्रमांक: जिजे २१ डीसी ६३०१) जामनेरकडे येत होते. १५ डिसेंबर २०२५ रोजी रात्री ९:३० वाजेच्या सुमारास हॉटेल शशीप्रभाजवळ ते आले असता, समोरून येणाऱ्या दुचाकीने (क्रमांक: एमएच १९ बीसी-८२७२) त्यांना जोरदार धडक दिली. दुचाकीचा चालक हॉटेल शशीप्रभाकडून जळगावच्या दिशेने चुकीच्या बाजूनेअत्यंत भरधाव वेगात येत होता. या चालकाने माधव रजपूत यांच्या दुचाकीला समोरून धडक दिली.
या धडकेमुळे रजपूत खाली पडल्याने त्यांच्या डाव्या पायाला आणि डाव्या हाताच्या बोटांना गंभीर दुखापत झाली आहे. तसेच त्यांच्या दुचाकीचेही मोठ्या प्रमाणावर नुकसान झाले आहे. अपघातानंतर संबंधित चालक पोलिसांना खबर न देता घटनास्थळावरून निघून गेला. फिर्यादी माधव रजपूत यांनी ९ जानेवारी २०२६ रोजी दिलेल्या तक्रारीवरून अज्ञात दुचाकी चालकाविरुद्ध गुन्हा दाखल करण्यात आला आहे. अधिकारी पोलीस हेड कॉन्स्टेबल गणेश भावसार तपास करीत आहे.
