रावेर शहरातील घटना
रावेर (प्रतिनिधी) – येथील एका हॉस्पिटलमध्ये औषधोपचार केल्यानंतर त्याचे बिल मागितल्याच्या कारणावरून संशयित दोन आरोपींनी डॉक्टरांना शिवीगाळ केली तर तिसऱ्या संशयित आरोपीने मारहाण केल्यावरून रावेर पोलीस स्टेशनला गुन्हा दाखल करण्यात आला आहे.
सावदा रोडवरील सुश्रुत हॉस्पिटलचे डॉ. योगेश अशोक महाजन (वय ४१) यांनी फिर्याद दिली आहे. त्यांच्या दवाखान्यामध्ये मनोहर वसंत महाजन (वय ५०, रा. रावेर) हा इसम जखमी असल्याने त्याच्यावर डॉ. योगेश महाजन यांनी औषधोपचार केले होते. बुधवारी रात्री ९ वाजेच्या सुमारास डॉ. योगेश महाजन यांनी त्याला बिल मागितले असता त्याने आणि त्याच्यासोबत असलेल्या योगेश राजू महाजन, प्रमोद एकनाथ महाजन यांनी डॉक्टरांना शिवीगाळ करून दमदाटी केली.
तसेच प्रमोद एकनाथ महाजन याने त्यांना मारहाण केल्याने रावेर पोलीस स्टेशनला गुरुवारी मध्यरात्री सव्वा वाजेच्या सुमारास गुन्हा दाखल करण्यात आला आहे. तपास उपनिरीक्षक इस्माईल शेख करीत आहेत.
