जळगावातील घटना
जळगाव (प्रतिनिधी) :- शहरातील शिवाजीनगर स्मशानभूमी परिसरात लोखंडी गुप्ती घेऊन परिसरात दहशत माजविणाऱ्या तरुणाला शहर पोलिसांनी कारवाई करत ताब्यात घेतले आहे. ही कारवाई सोमवारी १ जानेवारी रोजी दुपारी केली आहे. याबाबत शहर पोलीस ठाण्यात गुन्हा दाखल करण्यात आला आहे.
मयूर प्रशांत पाटील (वय-२१, रा. विदगाव ता.जि.जळगाव) असे संशयित आरोपीचे नाव आहे. शिवाजीनगर स्मशानभूमी परिसरात एक तरुण हातात लोखंडी गुप्ती घेऊन परिसरात दहशत माजवीत असल्याची गोपनीय माहिती पोलिसांना मिळाली होती. पथकाने सोमवारी १ जानेवारी रोजी दुपारी १२.३० वाजता शिवाजीनगर परिसरातील स्मशानभूमीजवळ कारवाई करत संशयित आरोपी मयूर पाटील याला ताब्यात घेतले. त्याच्याजवळून लोखंडी गुप्ती हस्तगत केली आहे.
याप्रकरणी पोलीस कॉन्स्टेबल रतन गीते यांनी दिलेल्या फिर्यादीवरून संशयित आरोपी मयूर प्रशांत पाटील याच्याविरोधात शहर पोलीस ठाण्यात गुन्हा नोंदविण्यात आला आहे. ही कारवाई पोलीस निरीक्षक अनिल भवारी यांच्या मार्गदर्शनाखाली पोलिस कर्मचाऱ्यांनी केली आहे.
