सावदा ता. रावेर (प्रतिनिधी) – वाघोदा येथील रहिवाशी ट्रकचालकाची परिचितांनी दारू पिण्याच्या वादातून नाशकात हत्या करून त्याचा मृतदेह औरंगाबाद जिल्ह्यातील वैजापूरजवळ फेकून दिल्याची घटना उघडकीस आली आहे तीनपैकी एका आरोपीला पोलिसांनी अटक केल्यावर या खुनाला वाचा फुटली
रावेर तालुक्यातील वाघोदा खुर्द येथील ३५ वर्षीय ट्रकचालक बेपत्ता झाले नसून दारू पिण्यावरून तिघांनी बेदम मारहाणीत त्यांना ठार केल्यानंतर औरंगाबाद-वैजापूर घाटात मृतदेह फेकून दिल्याचे आता स्पष्ट झाले या गुन्ह्यात एकाला सावदा पोलीसांनी अटक केली . इतर दोघे फरार आहेत . सावदा पोलीसात खूनाचा गुन्हा दाखल करण्यात आला आहे.
वाघोदा खुर्द येथील रहिवासी याकूब गयासुद्दीन पटेल (वय-३५) हा त्याची मालवाहू ट्रक (एम एच १९ सीवाय ६८४३) घेऊन जात असताना १५ मेरोजी सकाळी ऋषिकेश ऊर्फ माधव विठ्ठलराव शेजवळ (वय – २४ , रा.दावरवाडी ता.पैठण जि. औरंगाबाद ) , राजू ठेगडे (पूर्ण नाव माहीत नाही) (रा. पवन नगर नाशिक) आणि संजय (पूर्ण नाव माहीत नाही) (रा. औरंगाबाद) यांनी संगनमताने याकूब पटेलला नाशिक एमआयडीसी परिसरात घेवून गेले. तेथे तिघांमध्ये दारू पिण्याच्या वादावरून तिघांनी याकुब यांना बेदम मारहाण केली होती. मारहाणीत त्याचा मृत्यू झाला होता.
इकडे याकूब पटेल घरी आले नसल्याने सावदा पोलीस ठाण्यात ते बेपत्ता झाल्याची नोंद करण्यात आली होती पोलीसांनी तपासाची चक्रे फिरवत व मोबाईल लोकेशनच्या माध्यामातून याकूब यांच्या संपर्कातील ऋषीकेश शेजवळ याला ताब्यात घेतले. त्यांची चौकशी केली त्यात त्याने राजू ठेगडे (पूर्ण नाव माहीत नाही) आणि संजय या दोन साथीदारांची नावे सांगितली होती . सावदा पोलीसांनी ऋषीकेशला खाक्या दाखवताच त्याने आम्ही तिघांनि दारू पिण्याच्या वादातून बेदम मारहाण करून ठार केल्याची माहिती दिली. त्यानंतर तिघांनी संगनमताने मृतदेह औरंगाबाद ते वैजापूर मार्गावरील घाटात फेकून दिल्याचे सांगितले. या माहितीनुसार सावदा पोलीसांनी वैजापूर पोलीसांशी संपर्क साधला असता एकाची अकस्मात मृत्यूची नोंद झाली असल्याचे सांगण्यात आले.
या गुन्ह्यात तिन जणांवर याकूब पटेल यांचा खून केल्याचा गुन्हा दाखल करण्यात आला. इतर दोघे आरोपी अद्याप फरार आहेत. अटक केलेल्या ऋषीकेशला न्यायालयाने ८ ऑक्टोबरपर्यंत पोलीस कोठडी दिली आहे. विभागीय पोलिस अधिकारी विवेक लावंड यांच्या मार्गदर्शनाखाली सहाय्यक पोलिस निरीक्षक देविदास इंगोले, पोलीस उपनिरीक्षक राजेंद्र पवार, समाधान गायकवाड, पो कॉ संजय चौधरी, सुरेश आठवले, मोहसीन खान पठाण, विशाल खैरनार यांच्यासह सावदा पोलीस पुढील तपास करीत आहेत .
