चोपड्यात वनपरिक्षेत्र देवझिरी कार्यालय येथील घटना
जळगाव (प्रतिनिधी) : चोपडा तालुक्यात वनपरिक्षेत्र देवझिरी कार्यालय येथे एका इसमाने वनरक्षकांसह विद्यार्थ्यांना शिवीगाळ करून तुमचे मुंडके उडवून देईल अशी धमकी दिल्याने तसेच शासकीय कामात अडथळा निर्माण करणे तसेच शिवीगाळ, धक्काबुक्की आणि जिवे मारण्याची धमकी दिल्याने अडावद पोलीस स्टेशन येथे गुन्हा दाखल करण्यात आला आहे.
प्रथम वन अपराधातील नुकत्याच दाखल झालेल्या गुन्ह्यातील जप्त मुद्देमालातील सागाचे एकुण ४८ नग वनरक्षक विजय मोत्या पावरा यांनी वनपरिक्षेत्र देवझिरी कार्यालय येथे आणून ठेवले होते. त्यावेळी संशयित आरोपी कांतीलाल गुलाब पावरा (रा. खैर कुंडीपाडा) हा वनपरिक्षेत्र देवझिरी कार्यालय येथे आला. वनरक्षक व वनसेवक यांना जंगलातील तोडलेले सागाचे लाकडे उचलून आणण्यावरून शिवीगाळ करीत जिवे मारण्याची धमकी दिली. सागाची वृक्षतोड मीच केली होती व या पुढेही करेल असे बोलून तेथून निघून गेला. त्यानंतर बहिणाबाई चौधरी उत्तर महाराष्ट्र विद्यापीठ जळगाव येथील आदीमित्र सर्वेक्षणसाठी आलेले विद्यार्थ्यांना वनरक्षक गुन्ह्याच्या सर्व्हेकामी शासकीय वाहनात बसून सर्वेक्षणासाठी खैर कुंडीपाडा येथे गेले.
तेव्हा सदर इसमावर दाखल करण्यात आलेल्या गुन्ह्याचा राग आल्याने शासकीय वाहनावर तसेच कर्मचारी वनरक्षक विजय पावरा व वनसेवक रवींद्र बारेला, संजय बारेला यांना तसेच विद्यार्थ्यांवर दगडफेक करून शिवीगाळ आणि धक्काबुक्की केली. दगडफेकीमुळे शासकीय वाहनाचे नुकसान झाले आहे. पुढील तपास उपवनसंरक्षक यावल, सहाय्यक वनसंरक्षक चोपडा व देवझिरी वनपरिक्षेत्र अधिकारी यांचे मार्गदर्शनाखाली करण्यात आली, अशी माहिती सहा. वनसंरक्षक (वनीकरण व वन्यजीव) प्रथमेश वि. हाडपे, चोपडा यावल वनविभाग, जळगांव यांनी दिली आहे.