चाळीसगाव तालुक्यातील खरजई येथील घटना
चाळीसगाव (प्रतिनिधी) : शिवीगाळ करण्याच्या कारणावरुन कोयत्याने तरुणाच्या डोक्यावर वार करून गंभीर जखमी करत, आमच्या नादाला लागला तर कुटुंबातील सर्वांना गोळ्या घालून ठार मारण्याची धमकी दिल्याचा प्रकार तालुक्यातील खरजई येथे १५ एप्रिलला सायंकाळी ६ वाजेच्या सुमारास घडला. याप्रकरणी चाळीसगाव शहर पोलीस ठाण्यात पाच जणांविरोधात गुन्हा दाखल करण्यात आला आहे.
खरजई येथील अजय उत्तम काळे या तरुणाने फिर्याद दिली आहे. त्याच्या पाहुण्यास शिवीगाळ केल्याबाबत विचारणा केली असता संशयित जयेश दत्तात्रय शिंदे याने कोयत्याने अजय याच्या डोक्यावर वार केला. यात तो गंभीर जखमी झाला आहे. तर इतरांनी अजयचा मेहूणे दीपक जावरे यांना काठीने मारहाण केली. तर दीपक एरंडे याने आमच्या नादाला लागलात तर तुमच्या कुटुंबातील लोकांना गोळ्या घालून ठार मारण्याची धमकी दिली. ही घटना १५ रोजी सायंकाळी ६ वाजेच्या सुमारास अजय काळे यांच्या घरासमोर घडली. याप्रकरणी अजय काळे याच्या फिर्यादीवरून खरजई येथीलच जयेश दत्तात्रय शिंदे, योगेश एरंडे, दीपक एरंडे, महेश छोटू एरंडे, छोटू राजाराम एरंडे यांच्याविरोधात चाळीसगाव शहर पोलीस स्टेशनला गुन्हा दाखल करण्यात आला आहे. तपास सहाय्यक पोलीस निरीक्षक भरत चौधरी करत आहेत.
