वाढती गुन्हेगारी ठरतेय् पोलिसांसाठी डोकेदुखी
जळगाव (प्रतिनिधी) : शहरात गुन्हेगारीने पुन्हा एकदा डोके वर काढले असून खोटे नगर परिसरामध्ये एका तरुणावर धारदार शस्त्राने सपासप वार करून त्याला गंभीर जखमी करण्यात आल्याची धक्कादायक घटना मंगळवार दि. ६ जून रोजी रात्री ९:३० वाजेच्या सुमारास घडली आहे. शासकीय वैद्यकीय महाविद्यालय व रुग्णालयात गर्दी जमा झाली आहे. पोलिसांपुढे हल्लेखोरांना पकडण्याचे आव्हान उभे ठाकले असून ते हल्लेखोरांच्या मागावर गेले आहे.
अविनाश निंबा अहिरे (वय ३५, रा. कुसुंबा ता.जळगाव) असे गंभीर जखमी तरुणाचे नाव आहे. अविनाश अहिरे हा मित्र राम सुभाष कुकडे याच्यासोबत खोटेनगरजवळ कार (एमएच. १९. ईए.०४५१) उभी करून त्यामध्ये बसला होता. अचानक तीन ते चार तरूण त्याठिकाणी आले. त्यांनी जून्या वादातून अहिरे व कुकडे यांना मारहाण करून त्यांच्या कारच्या काचेवर दगडफेक केली. यामध्ये कारचे पुढील काच फुटले. नंतर एकाने अहिरे याच्यावर धारदार शस्त्राने वार केले. यामध्ये अहिरे हा गंभीर जखमी झाला. कुकडे याने लागलीच अहिरे याला तत्काळ जिल्हा रुग्णालयात आणले.
तपासणीअंती वैद्यकीय अधिकाऱ्यांनी त्यास शस्त्रक्रिया गृहामध्ये नेले. त्या ठिकाणी त्याच्यावर उपचार सुरू असून वैद्यकीय पथक शर्थीचे प्रयत्न करीत आहेत. दरम्यान घटना तालुका पोलीस स्टेशनच्या हद्दीत घडली असली तरी रात्री उशिरापर्यंत काहीही नोंद नव्हती. पोलीस घटनेची माहिती घेण्यात व्यस्त होते. पोलिसांना संशयित साहिल व इतर मारेकऱ्यांची माहिती मिळाली असून ते त्यांच्या मागावर असल्याचे कळाले. जखमी व्यक्ती सोबत असणाऱ्या दोन जणांना पोलिसांनी ताब्यात घेऊन गेले आहेत. शासकीय रुग्णालयामध्ये जखमी व्यक्तीच्या नातेवाईकांची व मित्रपरिवाराची गर्दी होत होती.
