भुसावळच्या जळगाव नाका परिसरात घटना
भुसावळ (प्रतिनिधी) : शहरातील जळगाव नाका परिसरात बुधवारी रात्री साडेआठ वाजेच्या सुमारास गोळीबाराची धक्कादायक घटना घडली. स्वर्गीय नारायण पाटील व्यापारी संकुलाजवळील पानाच्या टपरीवर लुटमारीच्या प्रयत्नातून एका ३९ वर्षीय व्यक्तीवर थेट गोळीबार करण्यात आला. या घटनेत उल्हास गणेश पाटील (वय ३९) हा तरुण गंभीर जखमी झाला असून त्याच्यावर सध्या जळगाव येथे उपचार सुरू आहेत.
जळगाव नाका परिसरातून खळवाडीकडे जाणाऱ्या पुलाच्या बाजूला स्वर्गीय नारायण पाटील व्यापारी संकुल आहे. या संकुलाजवळ असलेल्या पानाच्या टपरीवर बुधवारी रात्री चार अज्ञात तरुण आले. त्यांनी टपरीवर गोंधळ घालण्यास सुरुवात केली. त्यातील एकाने गुत्त्यावर ठेवलेली रोकड हिसकावून नेण्याचा प्रयत्न केला. यावेळी गुत्त्यावर उभा असलेला उल्हास गणेश पाटील याने त्यास विरोध करत हटकले.
याच क्षणी चौघांपैकी एका संशयिताने कमरेतून बंदूक काढून उल्हास पाटील याच्यावर थेट गोळीबार केला. गोळी उल्हासच्या उजव्या खांद्याजवळ लागल्याने तो रक्ताच्या थारोळ्यात कोसळला. गोळीबारानंतर चौघेही आरोपी घटनास्थळावरून पसार झाले. गोळीचा आवाज ऐकून परिसरातील नागरिकांनी घटनास्थळी धाव घेतली. नागरिकांनी तत्काळ जखमी उल्हास पाटील यास खाजगी रुग्णालयात दाखल केले. मात्र त्याची प्रकृती चिंताजनक असल्याने पुढील उपचारांसाठी त्याला जळगाव येथे हलवण्यात आले.
घटनेची माहिती मिळताच भुसावळ शहर पोलीस ठाण्याचे पोलीस निरीक्षक उद्धव डमाळे , स्थानिक गुन्हे शाखेचे पोलीस कर्मचारी तसेच विभागीय पोलीस अधिकारी संदीप गावित यांनी घटनास्थळी भेट देऊन पाहणी केली. परिसरातील नागरिकांकडून माहिती घेत घटनास्थळाचा पंचनामा करण्यात आला. दरम्यान, या घटनेमुळे जळगाव नाका परिसरात भीतीचे वातावरण पसरले आहे.
दरम्यान घटनास्थळी फॉरेन्सिक एक्सपोर्टच्या पथकाने येऊन घटनास्थळाची बारकाईने तपासणी केली. घटनास्थळी अप्पर पोलीस अधीक्षक अशोक नखाते यांनी भेट देऊन घटनेची माहिती जाणून घेतली.
