पाचोरा तालुक्यातील जारगाव येथील घटना
पाचोरा ( प्रतिनिधी ) – तालुक्यातील जारगाव येथे नव्याने राहण्यास आलेल्या एका कुटुंबात आज रविवारी पहाटे चारित्र्याच्या संशयावरून पतीने पत्नीची चाकूने शरीरावर गंभीर वार करून निर्घृण हत्या केल्याची धक्कादायक घटना घडली आहे. हत्या केल्यानंतर गळफास घेऊन आत्महत्या करण्याचा प्रयत्न करणाऱ्या पतीला पाचोरा पोलिसांनी अटक केली आहे.
प्रियंका खुशाल भदाणे (वय २५) असे मयत विवाहितेचे नाव आहे. या घटनेने जारगाव परिसरात खळबळ उडाली आहे. खुशाल भदाणे याला पत्नी प्रियंकाच्या चारित्र्यावर संशय होता. याच संशयावरून आज पहाटे दोघांमध्ये जोरदार वाद झाला. रागाच्या भरात खुशालने घरातील कामासाठी वापरण्यात येणाऱ्या चाकुने प्रियंकाच्या गळ्यावर आणि पोटात सपासप वार केले. या हल्ल्यात प्रियंकाचा जागीच मृत्यू झाला.
पत्नीचा खून केल्यानंतर खुशाल भदाणे याने स्वतः गळफास लावून आत्महत्येचा प्रयत्न केला. मात्र, वेळीच घटनेची माहिती मिळाल्याने पाचोरा पोलिसांनी घटनास्थळी धाव घेत त्याला आत्महत्येपासून परावृत्त केले आणि तात्काळ ताब्यात घेतले. (केसीएन)या घटनेप्रकरणी मयत प्रियंका हिच्या मावशीच्या फिर्यादीवरून पाचोरा पोलीस स्टेशनमध्ये पती खुशाल भदाणे याच्याविरुद्ध खुनाचा गुन्हा नोंदविण्यात आला आहे. घटनेचा पुढील तपास पोलीस निरीक्षक राहुलकुमार पवार यांच्या मार्गदर्शनाखाली पोलीस उपनिरीक्षक संजय निकुंभ हे करीत आहेत.
