अमळनेर तालुक्यातील एकलहरेजवळ अपघात
अमळनेर (प्रतिनिधी) :- अमळनेर येथून शिंदखेडाकडे कारने जात असताना चालकास अचानक शिंक आल्याने त्याचा वाहनावरील ताबा सुटून कार झाडावर आदळली. या अपघातात एकाच कुटुंबातील चार जण जखमी झाल्याची घटना दि. २७ जून रोजी रोजी दुपारच्या सुमारास एकलहरे गावाजवळ घडली आहे.
अमळनेर येथील पारस गोल्ड सराफी पेढीचे मालक संदीप थोरात हे खाजगी कामानिमित्त कारने पत्नी, आई व वहिनीसह शिंदखेडा येथे जात होते. एकलहरे गाव सोडल्यानंतर वळणावर त्यांना अचानक शिंक आल्याने त्यांचा वाहनावरील ताबा सुटून कडुनिंबाच्या झाडावर वाहन जोरदार धडकले.या अपघातात वाहनाचा पुढील भाग संपूर्ण चक्काचुर झाला. अपघातात संदीप थोरात यांना किरकोळ मार बसला.
मात्र त्यांच्या आईला गुडघ्याला जबर मार बसून पत्नीचा हात तर वहिनीचा पाय फ्रॅक्चर झाला. घटनेनंतर आईला नाशिक हलविण्यात आले तर उर्वरित तिघांवर अमळनेर येथे खाजगी रुग्णालयात उपचार सुरू आहेत. सदर घटनेची माहिती मिळताच नातेवाईक, मित्र परिवार, व्यापाऱ्यांनी रुग्णालयात धाव घेतली होती. घटनेची पोलीस माहिती घेत आहेत.
