चाळीसगाव तालुक्यातील तिरपोळे येथील घटना
चाळीसगाव (प्रतिनिधी) :- पिकाला भाव मिळत नसल्याने व्यथित झालेल्या शेतकऱ्याने घरातच वायरच्या सहाय्याने गळफास घेऊन आत्महत्या केल्याची घटना मंगळवारी दि. ५ रोजी घडली आहे. याप्रकरणी संबंधित पोलीस स्टेशनला अकस्मात मृत्यूची नोंद करण्यात आली आहे.
चंद्रसिंग पंडित जाधव (वय ४६, रा. तिरपोळे ता. चाळीसगाव) असे आत्महत्या करणाऱ्या शेतकऱ्याचे नाव आहे. चंद्रसिंग जाधव यांनी आपल्या शेतात मक्याची लागवड केली होती. मात्र, परतीच्या पावसामुळे मका पिकाचे प्रचंड नुकसान झाले. त्यात कपाशीला भाव नसल्याने जाधव हताश झाले होते. त्यातूनच त्यांनी आत्महत्या केल्याचे नातेवाइकांनी सांगितले. दरम्यान चंद्रसिंग जाधव हे दि. ५ नोव्हेंबरला पहाटे चारच्या सुमारास घरच्यांना घरात आढळून आले नाहीत. कुटुंबीयांनी त्यांचा शोध घेतला असता, घराच्या दुसऱ्या मजल्यावर बांधकाम सुरू असलेल्या खोलीतच त्यांनी वायरच्या सहाय्याने गळफास घेतलेल्या अवस्थेत आढळून आले. याबाबत शेखर जाधव याने दिलेल्या माहितीवरून येथील पोलिसांत आकस्मिक मृत्यूची नोंद करण्यात आली.
