आमदार मंगेश चव्हाण यांचा सलग ५ व्या वर्षाचा उपक्रम; दोन विशेष रेल्वेंची व्यवस्था
चाळीसगाव (प्रतिनिधी) : वारकरी कुटुंबाचा वारसा असणारे आमदार मंगेश चव्हाण यांनी चाळीसगाव मतदारसंघातील हजारो वारकऱ्यांसाठी “भक्ती ज्येष्ठांची… वारी पंढरीची” हा अभिनव उपक्रम सुरू केला आहे. परिस्थितीमुळे ज्यांना पंढरीची वारी शक्य नाही, अशा भाविकांना मोफत प्रवास, जेवण, निवास व्यवस्थेची सोय करून पंढरीचे दर्शन घडविले जाते. २०१९ मध्ये कोविड काळातील खंड वगळता आतापर्यंत १२ हजारहून अधिक भाविकांना आमदार मंगेश चव्हाण यांनी पंढरपूरला नेले आहे.
आमदार मंगेश चव्हाण यांच्या माध्यमातून दोन विशेष रेल्वे वारकऱ्यांसाठी आरक्षित करण्यात आल्या असून शनिवार, दि. ६ जुलै व दि. ९ जुलै रोजी विशेष रेल्वेने १० जुलै रोजी पंढरपूर येथे पोहोचतील. विशेष रेल्वे क्रमांक १- शनिवार दिनांक ६ जुलै रोजी, विशेष रेल्वे क्रमांक २- मंगळवार ९ जुलैला सायंकाळी ५ वा. छत्रपती शिवाजी महाराज चौक मैदान येथे आ. मंगेश चव्हाण व वारकऱ्यांच्या उपस्थितीत पालखी पूजन व पालखीचे चाळीसगाव रेल्वेस्टेशनकडे प्रस्थान होईल. रात्री ७ वा. चाळीसगाव रेल्वे स्टेशनहून विशेष ट्रेनने वारीला सुरुवात. रविवार दिनांक ७ जुलै, बुधवार व १० जुलै सकाळी ६ वा. पंढरपूर रेल्वे स्टेशन येथे विशेष ट्रेनचे आगमन व पायी चालत श्री शनि महाराज संस्थान मठ, सांगोला रोड, पंढरपूरकडे प्रस्थान होईल. सकाळी १० ते संध्या. ४ वा. सवडीनुसार चंद्रभागा स्नान, श्री विठ्ठल-रुख्मिणी दर्शन सायंकाळी ४ वा., श्री शनि महाराज मठ येथे सामूहिक हरिपाठ व आमदार मंगेश चव्हाण यांचा वारकऱ्यांशी संवाद संध्याकाळी ७ वाजता होणार आहे.
श्री शनि महाराज मठ येथून पंढरपूर रेल्वे स्टेशनकडे पायी चालत प्रस्थान व विशेष ट्रेनने परतीचा प्रवास. (७ जुलै व १० जुलै रोजी पंढरपूर येथे चाळीसगाव येथून आलेल्या वारकऱ्यांसाठी भोजन, वेळ सकाळी ८ ते दुपारी १२ तसेच सायंकाळी ५ ते ७ वाजेपर्यंत श्री शनि महाराज संस्थान मठ, सांगोला रोड, पंढरपूर येथे राहील.
हजारो वारकरी भाविकांना पंढरपूरला नेण्याचे आ.चव्हाण यांचे नियोजन आहे. त्यासाठी पंढरपूर वारी नियोजन समिती, भारतीय जनता पार्टी व शिवनेरी फाउंडेशनचे पदाधिकारी परिश्रम घेत आहेत. या तालुक्यातील हजारो वारकऱ्यांच्या नामघोषात यंदाही पंढरी दुमदुमणार आहे.
पंढरपूर वारीची पालखी २०१९ मध्ये मी पहिल्यांदा खांद्यावर घेतली. २३०० ज्येष्ठ नागरिकांना लक्झरी बसने पंढरपुरात नेले. विठूरायाच्या दर्शनाने ते सुखावले. पांडुरंगांच्या आशीर्वादाने मला विधानसभेचे दर्शन झाले. सामान्य कष्टकरी, वारकऱ्याचा मुलगा आमदार झाला. गेल्या दोन वर्षांपासून विशेष रेल्वेने हजारो भाविकांना पंढरपूर वारी घडवून आणत आहेत.
यावर्षी चाळीसगाव शहर व शहरालगत असणारी गावे यांच्यासाठी १ तसेच इतर उर्वरित ग्रामीण भागातील गावे यांच्यासाठी १ अश्या एकूण दोन विशेष रेल्वेंच्या माध्यमातून १० हजार वारकरी मायबापांना पंढरीचे दर्शन घडविण्यात येत असल्याची प्रतिक्रिया आमदार मंगेश चव्हाण यांनी दिली आहे.
