जामनेर शहर पोलीस स्टेशनची कारवाई
जळगाव (प्रतिनिधी) येथील शास्त्री नगर भागात गजानन महाराज मंदिराजवळ एका १७ वर्षीय अल्पवयीन मुलाला नकली असणाऱ्या गावठी बंदूक आणि चाकूसह ताब्यात घेण्यात आले आहे. नागरिकांच्या सतर्कतेमुळे हा प्रकार उघडकीस आला आहे.
गजानन महाराज मंदिर परिसरात ३० डिसेंबर रोजी सुमारे नऊच्या सुमारास एका तरुणाला तोंड बांधून संशयास्पदरितीने फिरताना काही नागरिकांनी पाहिले. संशय बळावल्याने त्यांनी त्याला रोखून चौकशी केली असता, त्याच्या कमरेजवळ नकली गावठी बनावटीची बंदूक व सुरा सापडला. यानंतर नागरिकांनी तातडीने जामनेर पोलिसांना घटनेची माहिती दिली.
माहिती मिळताच पोलीस निरीक्षक मुरलीधर कासार यांनी त्वरित पोलीस पथक घटनास्थळी पाठवले. पोलिसांनी मुलाला ताब्यात घेत त्याच्याकडील शस्त्र सामग्री जप्त केली. सदर मुलास जामनेर पोलीस ठाण्यात आणून त्याची चौकशी सुरू करण्यात आली आहे.
