स्थानिक गुन्हे शाखेची फुलगावात मोठी कारवाई
जळगाव ( प्रतिनिधी ) : जिल्ह्यात दहशत माजवण्यासाठी बेकायदेशीर शस्त्रे बाळगणाऱ्या गुन्हेगारांवर कारवाई करण्याचे आदेश पोलीस अधीक्षक डॉ. महेश्वर रेड्डी यांनी दिले होते. त्यानुसार, स्थानिक गुन्हे शाखेने गुप्त माहितीच्या आधारे २ आरोपींना गावठी पिस्तूल आणि २ जिवंत काडतुसांसह अटक केली आहे.
स्थानिक गुन्हे शाखेचे वरिष्ठ पोलीस निरीक्षक राहुल गायकवाड यांना गुप्त बातमीदारामार्फत माहिती मिळाली की, चरणसिंग चव्हाण आणि पंकज चव्हाण हे दोघे वरणगाव येथील फुलगाव पुलाजवळ गावठी कट्ट्यासह येणार आहेत. ही माहिती मिळताच, गणेशोत्सवाच्या पार्श्वभूमीवर, त्यांनी तात्काळ एक पथक तयार केले. या पथकाने सापळा रचून काळ्या-लाल रंगाच्या पल्सर मोटरसायकल (क्रमांक एमपी ६८ झेडसी ३३५७) वर आलेल्या दोन संशयित व्यक्तींना ताब्यात घेतले.
चौकशीअंती त्यांनी चरणसिंग उखा चव्हाण (वय-३६, रा. चौडी, जि. बऱ्हाणपूर, मध्य प्रदेश) आणि पंकज रतनसिंग चव्हाण (वय-२५, रा. मोरझिरा, ता. मुक्ताईनगर, जि. जळगाव) अशी नावे सांगितली.
त्यांच्या अंगझडतीत त्यांच्याजवळ एक गावठी बनावटीचा पिस्तूल, दोन जिवंत काडतुसे, मोटरसायकल आणि दोन मोबाईल असा एकूण १ लाख २९ हजार रुपयांचा मुद्देमाल सापडला.या संशयित आरोपींनी विनापरवाना बेकायदेशीरपणे दहशत माजवण्यासाठी ही शस्त्रे बाळगल्याचे निष्पन्न झाले आहे. त्यांच्यावर वरणगाव पोलीस ठाण्यात गुन्हा दाखल करण्यात आला आहे. ही कारवाई पोलीस अधीक्षक डॉ. महेश्वर रेड्डी आणि अपर पोलीस अधीक्षक अशोक नखाते यांच्या मार्गदर्शनाखाली, वरिष्ठ पोलीस निरीक्षक राहुल गायकवाड यांच्या नेतृत्वाखाली उपनिरीक्षक सोपान गोरे, पो.ह. यशवंत टहाकळे, प्रेमचंद सपकाळे, प्रितम पाटील, श्रीकृष्ण देशमुख, बबन पाटील, रविंद्र चौधरी, सचिन घुगे आणि भरत पाटील यांनी यशस्वीरित्या पार पाडली.
