गजबजलेल्या रजा टॉवर चौकात भरदुपारी थरार
भुसावळ ( प्रतिनिधी ) – शहरातील अत्यंत गजबजलेल्या रजा टॉवर चौकात गुरुवारी दुपारी किरकोळ वादाचे रूपांतर रक्तरंजित संघर्षात झाले. अज्ञात इसमाने केलेल्या चाकू हल्ल्यात १३ वर्षीय बालक गंभीर जखमी झाला असून, अन्य एक २० वर्षीय तरुणही जखमी झाला आहे. या घटनेमुळे परिसरात दहशतीचे वातावरण पसरले असून सार्वजनिक सुरक्षेचा प्रश्न ऐरणीवर आला आहे.
दुपारी ४ वाजेच्या सुमारास रजा टॉवर चौकात शेख समशेर शेख सलीम (वय १३) आणि मोहम्मद असत मोहम्मद अस्लम मेमन (वय २०) यांच्यात काही किरकोळ कारणावरून वाद झाला. सुरुवातीला शाब्दिक चकमक झाली, मात्र वादाचे पर्यावसान हाणामारीत झाले. यावेळी अज्ञात व्यक्तीने धारदार चाकूने हल्ला चढवला. यात १३ वर्षीय शेख समशेर याच्या डाव्या कानाजवळ चाकूचा खोलवर वार लागल्याने तो जागीच रक्तबंबाळ होऊन कोसळला.
या झटापटीत मोहम्मद असत याच्या डाव्या मांडीवर चाकू लागल्याने तो देखील गंभीर जखमी झाला आहे. घटनेनंतर स्थानिक नागरिकांनी जखमींना तातडीने भुसावळ येथील ट्रॉमा केअर सेंटर (ग्रामीण रुग्णालय) येथे दाखल केले.दुसऱ्या जखमी तरुणावर सध्या भुसावळ ग्रामीण रुग्णालयात उपचार सुरू आहेत. या धक्कादायक घटनेची नोंद बाजारपेठ पोलीस ठाण्यात अद्याप झालेली नाही.
जखमींची प्रकृती स्थिर होताच त्यांचे जबाब घेऊन पुढील कायदेशीर कारवाई व गुन्हा दाखल करण्याची प्रक्रिया पूर्ण केली जाईल, असे पोलीस सूत्रांनी सांगितले. भरदिवसा आणि गजबजलेल्या ठिकाणी घडलेल्या या हल्ल्यामुळे भुसावळकरांमध्ये भीतीचे सावट पसरले आहे. भरचौकात धारदार शस्त्राने हल्ला करण्यापर्यंत गुन्हेगारांची मजल गेल्याने संताप व्यक्त केला जात आहे.
“१३ वर्षीय मुलाची प्रकृती चिंताजनक असून तो काही काळ बेशुद्ध होता. प्राथमिक उपचारानंतर त्याला पुढील उपचारासाठी जळगाव येथे हलवण्यात आले आहे,” अशी माहिती वैद्यकीय अधिकारी डॉ. आसिफ शेख यांनी दिली.
