जळगाव तालुक्यात भोकर येथील घटना
जळगाव ( प्रतिनिधी ) – तालुक्यातील भोकर गावात राहणाऱ्या एका २१ वर्षीय तरूणाला विजेचा धक्का लागून त्याचा जागीच मृत्यू झाल्याची घटना शनिवारी २७ सप्टेंबर रोजी सायंकाळी ५ वाजेच्या सुमारास घडली आहे. या घटनेमुळे परिसरात हळहळ व्यक्त केली जात आहे. याबाबत जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
दत्तू दिलेरसिंग बारेला (वय २१ रा. भोकर ता. जळगाव) असे मयत तरूणाचे नाव आहे. त्याच्या पश्चात आई वडील, बहिण आणि मोठा भाऊ असा परिवार आहे. भोकर गावात दत्तू बारेला हा तरुण कुटुंबियांसह वास्तव्याला होता. शनिवारी २७ सप्टेंबर रोजी त्याचे आईवडील व बहिण हे शेतात कामासाठी गेले होते. त्यावेळी दत्तू हा घरी एकटाच होता. सायंकाळी ५ वाजेच्या सुमारास तो ईलेक्ट्रीक वायर जोडत असतांना त्याला अचानक विजेचा धक्का बसला, त्यात तो जागीच ठार झाला.
तरुणाचे आईवडील सायंकाळी घरी आले तेव्हा हा प्रकार समोर आला. त्याला जळगाव येथील शासकीय वैद्यकीय महाविद्यालयात दाखल केले असता वैद्यकीय अधिकारी यांनी तपासून त्याला मृत घोषित केले. याबाबत जळगाव तालुका पोलीस ठाण्यात अकस्मात मृत्यूची नोंद करण्यात आली आहे.
