भडगाव शहरातील छत्रपती शिवाजी चौकातील घटना
भडगाव ( प्रतिनिधी ) – शहरातील छत्रपती शिवाजी महाराज चौक येथील न्यू मिलन टी हॉटेलमध्ये दुपारी सुमारे १.३० वाजता डी-फ्रीजच्या कॉम्प्रेसरचा स्फोट झाला. या अपघातात हॉटेल चालकाच्या मुलासह ९ ते १० नागरिक गंभीर जखमी झाले असून रुग्णालयात त्यांच्यावर उपचार सुरू आहेत.
पुढील उपचारासाठी पाचोरा, जळगाव आणि धुळे येथे हलवण्यात आले आहे. सुदैवाने या घटनेत जीवितहानी झाली नाही. हॉटेलमध्ये चहा पिण्यासाठी बसलेल्या नागरिकांना स्फोटाचा फटका बसला. जखमींमध्ये भडगावबाहेरील जिल्ह्यांतील आणि इतर राज्यातील नागरिकांचा समावेश आहे. हॉटेल चालकाचा मुलगा सोहिल मणियार (भडगाव) याला धुळे येथे हलविले गेले आहे, तर इतर जखमींवर पाचोरा येथील विघ्नहर्ता हॉस्पिटल, सिद्धिविनायक हॉस्पिटल आणि ग्रामीण रुग्णालयात उपचार सुरू आहेत. काही जखमींना समर्पण हॉस्पिटलमध्ये दाखल करण्यात आले आहे. जखमींमध्ये सोहिल मणियार (हॉटेल चालकाचा मुलगा, भडगाव), राजकुमार पवार (कर्नाटक), नितीन पाटील (सातारा), गजानन शेळके (जालना), रवींद्र सोनवणे, भडगाव, दिलीप पाटील, भडगाव, भूषण पाटील (जुवार्डी), मयूर राजपूत (वडधे), मोसिम खान (भडगाव), मिर्झा आणि इतर ३-४ नागरिकांचा समावेश आहे.
भडगाव ग्रामीण रुग्णालयाचे वैद्यकीय अधिकारी डॉ.पंकज जाधव यांनी दिलेल्या माहितीनुसार, जखमींना प्राथमिक उपचारानंतर तात्काळ पाचोरा येथील खासगी रुग्णालयात हलविले गेले. घटनेची माहिती मिळताच पाचोरा-भडगाव विधानसभा मतदारसंघाचे आमदार किशोर पाटील यांनी रुग्णालयाला भेट देऊन जखमींना मदत केली. घटनास्थळी आणि रुग्णालयात नातेवाईक व मित्रांच्या गर्दीमुळे तणाव निर्माण झाला होता. भडगाव पोलीस स्टेशनच्या उपनिरीक्षक लक्ष्मी करनकाळ, स्थानिक गुन्हे शाखेचे लक्ष्मण पाटील आणि इतर पोलिस कर्मचाऱ्यांनी बंदोबस्त ठेवला.
