जळगावातील पाटीलवाडा येथील घटना
जळगाव (प्रतिनिधी) : जळगाव शहरात राहत असलेल्या मानलेल्या बहिणीकडे आलेल्या भावाला अज्ञात दोन जणांनी विरोध करून त्याची दुचाकी पेटवून दिल्याची धक्कादायक घटना शुक्रवार दि. ७ जून रोजी मध्यरात्री पाटीलवाडा परिसरात घडली आहे. या प्रकरणी शहर पोलिस ठाण्यात दोघांविरुद्ध गुन्हा दाखल करण्यात आला आहे.
धर्मा गोपीचंद वायकर (४८, रा. दापोरा, ता. जळगाव) यांनी फिर्याद दिली आहे. धर्मा वायकर यांची जळगावात मानलेली बहीण राहते. ते त्यांच्याकडे आले होते. हा इसम येथे का आला या रागातून मध्यरात्री एक वाजेच्या सुमारास गजानन गोरख पाटील (रा. आव्हाणे) व त्याच्या सोबत एक जण आला. त्यांनी वायकर यांची दुचाकी (क्र. एमएच १९, डीसी ६८५७) खाली पाडली. त्यानंतर ते बाटलीमध्ये पेट्रोल घेऊन आले. ते दुचाकीवर टाकून ती पेटवून दिली. त्यानंतर दोघे जण तेथून पळून गेले. या प्रकरणी धर्मा वायकर यांनी शहर पोलिस ठाण्यात फिर्याद दिली. त्यावरून गजानन पाटील व एका जणाविरुद्ध गुन्हा दाखल करण्यात आला आहे. पुढील तपास पोहेकॉ दीपक शिरसाठ करीत आहेत.
