यावल तालुक्यातील घटना
यावल (प्रतिनिधी) : – भुसावळकडे जाणाऱ्या उसाच्या भरधाव ट्रॅक्टरखाली आल्याने १२ वर्षीय मुलाचा जागीच मृत्यू झाला. ही घटना यावल- भुसावळ मार्गावरील निमगाव येथील नयनसिंग पाटील यांच्या शेताजवळ बुधवारी दि. २० रोजी दुपारी अडीचच्या सुमारास घडली. याबाबत ट्रॅक्टरचालकावर यावल पोलीस स्टेशनला गुन्हा दाखल करण्यात आला आहे.
यावलहून भुसावळ मार्गे मुक्ताईनगर येथे ऊस वाहतूक करणारे ट्रॅक्टर (क्रमांक एमएच १९, डीएफ २५३५) जात असताना निमगावजवळ नयनसिंग खुबसिंग पाटील यांच्या शेताजवळ ट्रॅक्टरच्या मागील ट्रॉलीच्या चाकाखाली आनंद रघुनाथ सोनवणे (वय १२, रा. निमगाव ता. यावल) हा बालक आल्याने त्याचा जागीच मृत्यू झाला. याबाबत मृत आनंदचे काका किरण फफिरा कोळी यांनी यावल पोलिस ठाण्यात फिर्याद दिली.
ट्रॅक्टरचालक सोनू छोटू पारधे (रा. डोडीकर, ता. चाळीसगाव) याच्याविरुद्ध गुन्हा दाखल करण्यात आला आहे. पोलिस निरीक्षक राकेश मानगावकर यांच्या मार्गदर्शनाखाली उमेश सानप तपास करीत आहेत. दरम्यान, मृत मुलाच्या मृतदेहाचे विच्छेदन यावलच्या ग्रामीण रुग्णालयात झाल्यावर नातेवाईकांच्या ताब्यात देण्यात आले.
