संस्थापक अध्यक्ष डॉ.सोनवणेंनी दिले नियुक्ती पत्र
जळगाव ( प्रतिनिधी ) – भारत होमिओपॅथिक असोसिएशन, नाशिक यांच्या वतीने जळगाव जिल्ह्यासाठी नवीन पदाधिकारी नियुक्ती जाहीर करण्यात आली आहे. जळगाव जिल्ह्यातील होमिओपॅथी क्षेत्रात कार्यरत असलेले डॉ. विवेक मनोहर पाटील यांची जिल्हा सचिवपदी नियुक्ती करण्यात आली आहे.
डॉ. पाटील यांच्या कार्यक्षमता, संघटनात्मक सहभाग तसेच होमिओपॅथी क्षेत्रातील सेवाभावी योगदानाची दखल घेऊन ही नियुक्ती करण्यात आली आहे. त्यांच्या माध्यमातून जिल्ह्यातील होमिओपॅथिक डॉक्टरांचे प्रश्न शासनदरबारी मांडणे, संघटनात्मक बांधणी मजबूत करणे, तालुका व शहर पातळीवर समित्या स्थापन करणे तसेच जनजागृती व सदस्य नोंदणी उपक्रम प्रभावीपणे राबविण्याचे कार्य केले जाणार आहे.
भारत होमिओपॅथिक असोसिएशनचे संस्थापक अध्यक्ष डॉ. गौरव सुनील सोनवणे यांनी डॉ. विवेक पाटील यांचे अभिनंदन करून त्यांच्या पुढील कार्यकाळासाठी शुभेच्छा दिल्या आहेत. या नियुक्तीमुळे जळगाव जिल्ह्यात होमिओपॅथी चळवळीला नवी दिशा व बळ मिळेल, असा विश्वास व्यक्त करण्यात आला आहे.
