जळगाव तालुक्यातील नशिराबाद येथील घटना
जळगाव (प्रतिनिधी) : तालुक्यातील नशिराबाद येथे बांधकाम सुरु असताना दुसऱ्या मजल्यावरून पडून गंभीर जखमी झालेल्या तरुणाचा उपचारादरम्यान मृत्यू झाल्याची धक्कादायक घटना शनिवारी दि. ३० ऑगस्ट रोजी दुपारी ४ वाजता उघडकीस आली आहे. याप्रकरणी नशिराबाद पोलीस स्टेशनला अकस्मात मृत्यूची नोंद घेण्याचे काम सुरु होते.
सादिक मेहमूद पिंजारी (वय ३५, रा. नशिराबाद, ता. जळगाव) असे मयत तरुणाचे नाव आहे. तो आई, वडील, पत्नी, १ मुलगा, १ मुलगी यांच्यासह राहत होता. मिस्त्रीकाम करून परिवाराचा उदरनिर्वाह करीत होता.(केसीएन)दरम्यान, नशिराबाद येथे भवानी नगर परिसरात एका ठिकाणी बांधकामाचे काम सुरु आहे. याठिकाणी मिस्त्री काम शनिवारी दि. ३० ऑगस्ट रोजी सकाळी करीत असताना साजिद हा ९ वाजेच्या सुमारास दुसऱ्या मजल्यावरून खाली पडला.
यावेळी त्याला डोक्याला, अंगाला जबर मार लागला. ग्रामस्थांनी तातडीने त्याला शासकीय वैद्यकीय महाविद्यालय व रुग्णालयात उपचारासाठी दाखल केले होते. उपचार सुरु असताना त्याचा दुपारी ४ वाजता मृत्यू झाला.(केसीएन)यावेळी कुटुंबीयांनी एकच आक्रोश केला. या घटनेमुळे नशिराबाद येथे शोककळा पसरली आहे. तरुणाच्या मृत्यूमुळे रुग्णालयात गर्दी झाली होती. घटनेप्रकरणी नशिराबाद पोलीस तपास करीत असून अकस्मात मृत्यूची नोंद करण्याचे काम सुरु होते.
