भडगाव बसस्थानकावर घटना
भडगाव (प्रतिनिधी):- भडगाव बसस्थानकावर बसमध्ये चढत असताना प्रवाशांच्या गर्दीचा फायदा घेऊन एका अज्ञात चोरट्याने महिलेच्या गळ्यातील सोन्याचे मणी असलेले जुने मंगळसूत्र (पोत) लंपास केल्याची घटना घडली आहे. याप्रकरणी भडगाव पोलीस ठाण्यात चोरीचा गुन्हा दाखल करण्यात आला आहे.
फिर्यादी स्नेहल नवीनचंद्र भावसार (वय ५०, रा. दोंडाईचा, शहादा रोड, ता. शिंदखेडा, जि. धुळे) या शनिवारी (दि. १७ जानेवारी २०२६) दुपारी भडगाव बसस्थानकावरून बसमध्ये चढत होत्या. दुपारी २:२० वाजेच्या सुमारास बसमध्ये चढत असताना प्रवाशांची मोठी गर्दी होती. याच गर्दीचा फायदा घेऊन कोणीतरी अज्ञात चोरट्याने त्यांच्या गळ्यातील ६६,००० रुपये किमतीचे सोन्याचे मणी असलेले जुने मंगळसूत्र अतिशय शिताफीने चोरून नेले.
आपले मंगळसूत्र चोरीला गेल्याचे लक्षात येताच स्नेहल भावसार यांनी तात्काळ भडगाव पोलीस ठाणे गाठून तक्रार दिली. या तक्रारीवरून पोलिसांनी अज्ञात चोरट्याविरुद्ध चोरीचा गुन्हा नोंदवला आहे. पोलीस हवालदार विजय धर्मा जाधव या प्रकरणाचा पुढील तपास करत आहेत. भडगाव पोलीस ठाण्याचे पोलीस निरीक्षक महेश शर्मा यांच्या मार्गदर्शनाखाली पथक चोरट्याचा शोध घेत आहे.
