जळगाव (प्रतिनिधी) – शहरातील पिंप्राळा हुडको येथे झाडाला गळफास घेवून एकाने आत्महत्या केल्याची घटना सोमवारी सायंकाळी घडली. याप्रकरणी रामानंद नगर पोलीस ठाण्यात अकस्मात मृत्यूची नोंद करण्यात आली आहे.
याबाबत अधिक माहिती अशी की, ज्ञानेश्वर भानु चव्हाण वय-३५ रा. मरीमाता मंदीराजवळ पिंप्राळा हुडको, जळगाव हे मजूरी करून आपल्या कुटुंबाचा उदरनिर्वाह करतात. घरात पत्नी, मुलगीसह राहतात. सोमवारी १४ डिसेंबर रोजी दुपारी २ वाजता जेवण करून ते घरातून निघाले. बाहेर जावून येतो असे सांगून घराबाहेर पडले. सायंकाळी उशीरा घरी न आल्यानंतर पत्नी व मुलीने त्यांचा शोध घेतला. घरापासून काही अंतरावर असलेल्या मोकळ्या मैदानाच्या झाडाला ओढणीने गळफास घेतल्याचे दिसून आले. पतीचा मृतदेह पाहून पत्नीने हंबरडा फोडला होता. गळफास घेण्याचे कारण अद्याप कळू शकले नाही. याप्रकरणी रामानंदनगर पोलीस ठाण्याचे पोलीस कर्मचारी घटनास्थळी धाव घेवून पंचनामा केला. याप्रकरणी रामानंदनगर पोलीस ठाण्यात अकस्मात मृत्यूची नोंद करण्यात आली आहे. पुढील तपास पो.ना. महेंद्र पाटील करीत आहे.
