जळगाव एमआयडीसी पोलिसांनी केली तिघांची चौकशी
जळगाव (प्रतिनिधी) :- वैद्यकीय औषधांचा व्यावसायिक तरुण शुक्रवारी रात्री ८ वाजेनंतर जळगाव शहरातून संशयास्पदरीत्या बेपत्ता झाला होता. त्याची दुचाकी व मोबाइल कृषी उत्पन्न बाजार समितीच्या परिसरात मिळून आली होती. पोलिसांनी व्यवसायाशी संबंधित दोघांसह दुचाकीसोबत सीसीटीव्ही कॅमेऱ्यात दिसणारा हमाल अशा तिघांची पोलिसांकडून चौकशी सुरू केली आहे. दरम्यान, रविवारी दि. १ डिसेंबर रोजी सकाळी ८. ३० वाजता इंदौर येथील एका हॉटेलमध्ये हा तरुण पोलिसांच्या टीमला आढळून आला असल्याची माहिती निरीक्षक निकम यांनी “केसरीराज” ला दिली.
नीरज प्रभाकर चव्हाण (वय २७, रा. चहार्डी, ता. चोपडा ह.मु. भुसावळ) असे बेपत्ता तरुणाचे नाव आहे. हा तरुण व त्याचे दोन मित्र अशा तिघांनी भुसावळ येथे मेडिकलचा व्यवसाय सुरू केला. जळगावच्या नेरी नाका परिसरात एका एजन्सीशी त्यांचा दैनंदिन संबंध असल्याने त्यांचे तेथे येणे जाणे होते. काही दिवसांपासून व्यवसायातून तिघांमध्ये धुसफुस सुरू झाल्याने महिन्याभरापासून नीरज चव्हाण हा या मेडिकल एजन्सीचे काम सांभाळत होता.(केसीएन) सातत्याने वाद होत असल्याने व्यवसायात एकत्र रहायचे की नाही याचा अंतिम निर्णय शनिवारी घेण्याचे ठरले होते. शुक्रवारी सायंकाळी साडे सात वाजता नीरज याने एजन्सीचे दुकान बंद केले. त्याच वेळी त्याला एकाचा फोन आला.
त्यानंतर नीरजचा संपर्क तुटला. त्यामुळे भयभीत झालेल्या पत्नी व कुटुंबीयांनी एमआयडीसी पोलिस ठाणे गाठून सर्व प्रकार सांगितला. त्यानुसार हरविल्याची नोंद करण्यात आली. पोलिस व कुटुंबियांनी केलेल्या चौकशीत शनिवारी पहाटेच्या सुमारास नीरजची दुचाकी व मोबाइल कृषी उत्पन्न बाजार समितीसमोर मिळून आली. ही दुचाकी एक हमाल आणताना सीसीटीव्हीत दिसून आला.(केसीएन)त्याला पोलिसांनी चौकशीसाठी ताब्यात घेतले असता, मी मद्याच्या नशेत होतो. मला कोणी तरी दारूचे आमिष दाखवून ही दुचाकी या ठिकाणी लावायला सांगितली. त्यानुसार ती पार्किंग केली अशी माहिती त्याने तपासात दिल्याचे पोलीस निरीक्षक दत्तात्रय निकम यांनी सांगितले.
मोबाईलवर अनेक कॉल आलेले आहेत, मात्र साडेसातनंतर एकही कॉल रिसीव्ह झालेला नाही. व्यवसायाशी संबंधित दोघांना पोलिसांनी चौकशीसाठी ताब्यात घेतले आहे. दरम्यान, सदर तरुण नीरज हा इंदौर येथे असल्याची माहिती मिळाल्यावर एमआयडीसी पोलीस स्टेशनचे कर्मचारी आणि नातेवाईकांनी घटनास्थळ गाठले. (केसीएन)रविवारी दि. १ डिसेंबर रोजी सकाळी एमआयडीसी पोलिसांनी इंदौर गाठून एका हॉटेलमधून नीरज चव्हाण याला ताब्यात घेतले असून रात्रीपर्यंत जळगावात येतील अशी माहिती निरीक्षक दत्तात्रय निकम यांनी “केसरीराज” ला दिली. दरम्यान, पोलीस स्टेशनला आल्यावरच नीरज नेमका कसा बेपत्ता झाला त्याची माहिती मिळणार आहे.
