पाचोरा ( प्रतिनिधी ) – जळगावचे जी. एच. रायसोनी इन्स्टिट्यूट ॲण्ड मॅनेजमेंट विद्यालय येथे महानगरपालिकेचे स्वीकृत नगरसेवक विराज कावडिया यांचेतर्फे २५ वर्षाच्या आतील पुरुषांच्या उत्तर महाराष्ट्र बास्केट बॉल स्पर्धेचे आयोजन करण्यात आले पाचोरा संघाने बाजी मारत विजेते पद पटकाविले.
या स्पर्धेत धुळे, जळगांव, ऑ. फॅ. वरणगाव, नंदुरबार, चाळीसगाव येथील संघांनी सहभाग नोंदविला होता. पाचोरा व चाळीसगाव संघाने अंतिम सामन्यात मजल मारली. अंतिम सामन्यात पाचोरा संघाने ४२ गुण तर चाळीसगाव संघाने १५ गुण मिळविले. पाचोरा संघाने २७ गुणांनी विजय मिळवला. चाळीसगाव संघास उपविजेता पदावर समाधान मानावे लागले.
पाचोरा संघास विराज कावडिया, जितेंद्र शिंदे यांचे हस्ते पारितोषिक देण्यात आले. विजेत्या पाचोरा बास्केट बॉल संघास मुख्य प्रशिक्षक दिपक (आबा) पाटील व सुशांत जाधव यांचे मार्गदर्शन लाभले. विजयी संघाचे पाचोरा तालुका शिक्षण संस्थेचे अध्यक्ष तथा माजी आमदार दिलीप वाघ, चेअरमन संजय वाघ, एम. एम. महाविद्यालयाचे प्राचार्य डॉ. वासुदेव वले यांनी अभिनंदन केले आहे.
