यावल तालुक्यातील किनगाव येथील घटना
जळगाव (प्रतिनिधी) : यावल तालुक्यातील किनगाव येथील शेतकी शाळेसमोर भरधाव बसने दुचाकीस्वाराला जबर धडक दिल्याने दुचाकीवरील शेतकऱ्याचा मृत्यू झाल्याची धक्कादायक घटना बुधवारी दि. २६ मार्च रोजी दुपारी १२ वाजेच्या सुमारास घडली आहे. याप्रकरणी यावल पोलीस स्टेशनला गुन्हा दाखल करण्याचे काम सुरु होते.
अशोक यशवंत सपकाळे (वय ६८, रा. किनगाव ता. यावल) असे मयत शेतकऱ्याचे नाव आहे. ते गावात पत्नी, मुलगा, सून, ३ मुली यांचेसह राहत होते. एका बँकेत काम करून ते सेवानिवृत्त झालेले आहेत. त्यानंतर ते शेती काम करीत होते.(केसीएन) दरम्यान किनगाव येथून शेताकडे बुधवारी सकाळी ते जात असताना त्यांची दुचाकी (एमएच १९ एटी ८५८८) शेतकी शाळेसमोर आली असताना एसटी महामंडळाची बस (एमएच १४ बीटी २१४४) हिने अशोक सपकाळे यांच्या दुचाकीला जबर धडक दिली.
या धडकेत अशोक सपकाळे हे गंभीर जखमी झाले. त्यांना किनगाव आरोग्य केंद्रात आणल्यानंतर पुढील उपचारासाठी जळगाव येथील शासकीय वैद्यकीय महाविद्यालय व रुग्णालयात उपचारासाठी रवाना करण्यात आले होते.(केसीएन)जळगाव रुग्णालयात वैद्यकीय अधिकाऱ्यांनी तपासून त्यांना मयत घोषित केले. यावेळी नातेवाईकांनी एकच आक्रोश केला. या घटनेमुळे किनगाव येथे शोककळा पसरली आहे. घटनास्थळी यावल पोलिसांनी धाव घेऊन घटनेची माहिती जाणून घेली. तर यावल पोलीस स्टेशनला गुन्हा दाखल करण्याचे काम सुरु होते.
