मुक्ताईनगर ( प्रतिनिधी ) – मुक्ताईनगर शहरात स्टेट बँकेजवळ बसने एका विद्यार्थीनीला धडक दिल्याने ती यात जखमी झाली आहे.
सूत्रांनी दिलेली माहिती अशी की, आज सकाळी शहरातील स्टेट बँकेजवळ १२ वर्षाच्या मुलीस बसने धडक दिली. यात त्या मुलीच्या सायकलीचा चेंदामेंदा झाला असून विद्यार्थीनी जखमी झाली आहे. या संदर्भातील माहितीनुसार (एमएच १४ बीटी ४१०) या क्रमांकाची शेगाव ते नवापूर बस ही वेगाने जात असतांना ऋतुजा राजेंद्र कोल्हे या विद्यार्थीनीला बसने धडक दिली. यात सदर विद्यार्थीनीची सायकल पूर्णपणे चेंदामेंदा झाली असून ऋतुजा जखमी झाली आहे. तिला उपचारासाठी रूग्णालात दाखल करण्यात आले आहे.
अपघाताची माहिती मिळताच परिसरातील नागरिकांनी घटनास्थळी धाव घेऊन ऋतुजाला तात्काळ रूग्णालयात पाठविले. मुक्ताईनगरात बेशीस्त वाहतुकीचा अक्षरश: कळस झाला असून रस्त्यात कुणी कसेही वाहन उभे करतो. यामुळे नेहमी ट्रॅफीक जाम होत असते. यातच नगरपंचायतीने शहरात कुठेही गतीरोधक उभारलेले नसल्याने अनेकदा लहान – मोठे अपघात होत असतात. याच प्रकारे आज विद्यार्थीनीचा अपघात झाल्याने परिसरात खळबळ उडाली आहे. दरम्यान, संबंधीत बस ही नवापूर आगाराची असल्याची माहिती मिळाली आहे.
