शनिपेठेत १९ वर्षीय तरुणावर कारवाई
जळगाव (प्रतिनिधी):- मकर संक्रांतीचा सण जवळ येत असतानाच प्रशासनाने प्रतिबंधित केलेल्या नायलॉन मांजाची विक्री आणि वापर करणाऱ्यांविरुद्ध जळगाव पोलिसांनी कडक पाऊल उचलले आहे. शहरातील कांचन नगर भागात नायलॉन मांजा बाळगणाऱ्या एका १९ वर्षीय तरुणावर शनिपेठ पोलिसांनी कारवाई केली आहे. ३१ डिसेंबर २०२५ रोजी सायंकाळी ६ वाजेच्या सुमारास शनिपेठ पोलीस ठाण्याचे कर्मचारी गस्त घालत असताना, त्यांना कांचन नगरमधील सद्गुरू नगर जवळ एक तरुण संशयास्पदरीत्या मिळून आला.
त्याची झडती घेतली असता, त्याच्याकडे ‘मोनो काईट फायटर्स’ कंपनीचे नायलॉन मांजाचे २ रील (किंमत ६०० रुपये) मिळून आले. प्रशासनाने नायलॉन मांजावर बंदी घातलेली असतानाही, मानवी जीविताला धोका निर्माण होईल अशा पद्धतीने हा मांजा बाळगल्याप्रकारणी पोलिसांनी कारवाई केली. याप्रकरणी पोलीस कॉन्स्टेबल नवजित चौधरी यांनी दिलेल्या फिर्यादीवरून संशयित आरोपी गौरव प्रमोद बऱ्हाटे (वय १९, रा. कांचन नगर, जळगाव) याच्याविरुद्ध शनिपेठ पोलीस ठाण्यात गुन्हा दाखल करण्यात आला आहे.
शनिपेठ पोलीस ठाण्याच्या पोलीस निरीक्षक कावेरी कमलाकर यांच्या मार्गदर्शनाखाली पोलीस हवालदार अलताफ पठाण या प्रकरणाचा पुढील तपास करत आहेत. मकर संक्रांतीच्या पार्श्वभूमीवर नायलॉन मांजा विकणाऱ्यांवर आणि वापरणाऱ्यांवर पोलिसांची करडी नजर असणार आहे.
