जळगावातील घटनेप्रकरणी पोलीस अधीक्षकांची माहिती
जळगाव (प्रतिनिधी) : महानगरपालिकेमध्ये जन्म मृत्यू नोंदणीसाठी आलेल्या दाखल्यांमध्ये तहसीलदार यांच्या सही व शिक्क्याचे बनावट अर्ज आल्याप्रकरणी झालेल्या चौकशीत ४३ जणांविरुद्ध शहर पोलिसात गुन्हा दाखल करण्यात आला होता. स्थानिक गुन्हे शाखेने प्रकरणाचा तपास करून यातील दोन मुख्य संशयित वकील आरोपींना अटक केली आहे. त्यांना न्यायालयात हजर केले असता तीन दिवसांची पोलीस कोठडी न्यायालयाने सुनावली आहे, अशी माहिती पोलीस अधीक्षक डॉ महेश्वर रेड्डी यांनी पत्रकार परिषदेमध्ये दिली.
जळगाव महानगरपालिकेमध्ये जन्म-मृत्यू नोंदणी विभागामध्ये तहसील कार्यालयातून ५० दाखल्यांसाठी प्रमाणपत्रे आले होते. या प्रमाणपत्रांवर असलेले तहसीलदार यांचे सही व शिक्के हे बनावट असल्याचा संशय जन्ममृत्यू नोंदणी विभागाला आला होता. याप्रकरणी तहसीलदारांना पत्र लिहून चौकशीची मागणी केली होती. या प्रकरणी तहसीलदार शितल राजपूत यांनी चौकशी करून याप्रकरणी नायब तहसीलदार यांनी दाखल केलेल्या तक्रारीवरून शहर पोलीस ठाण्यात ४३ जणांविरुद्ध गुन्हा दाखल करण्यात आला होता. या प्रकरणाचा बांगलादेशाशी संबंध जोडल्या जात असल्याने शहर पोलीस ठाण्यात दाखल असलेला गुन्हा स्थानिक गुन्हे शाखेकडे तपासासाठी वर्ग करण्यात येऊन पोलिसांनी या प्रकरणातील ३५ जणांची तपासणी करण्यात आली.
यात संशयित आरोपी म्हणून वकील शेख मोहम्मद रईस बागवान (रा. शाहूनगर, जळगाव), शेख मोहसीन शेख सादिक मणियार (रा. पिंप्राळा, जळगाव) यांचे नाव निष्पन्न झाले आहे. सर्व ३५ जणांना विविध शासकीय कामकाजासाठी बनावट जन्म-मृत्यू दाखले या वकिलांनी करून दिल्याचे प्रथमदर्शनी तपासात दिसत असल्याचे पोलीस अधीक्षकांनी सांगितले. त्यानुसार वकील शे. मोहम्मद व शे. मोहसीन यांना अटक करण्यात आली आहे. त्यांना सोमवारी न्यायालयात हजर केले असता तीन दिवसांची पोलीस कोठडी सुनावण्यात आली आहे.
