शेतातील घरात काम करीत असताना १३ वर्षीय बालिकेचा सर्पदंशाने मृत्यू

जळगाव ( प्रतिनिधी ) – पाचोरा तालुक्यातील लासगाव येथे शेतातील घरामध्ये काम करीत असताना एका लहान बालिकेला नागाने दंश केल्यामुळे तिचा मृत्यू झाल्याची धक्कादायक घटना शनिवार दि. २१ जून रोजी सकाळी ८ वाजेच्या सुमारास घडली आहे. याप्रकरणी संबंधित पोलीस स्टेशनला अकस्मात मृत्यूची नोंद करण्यात आली आहे.

यास्मिन शेख बाबू (वय १३, रा.लासगाव ता. पाचोरा) असे मयत तरुणीचे नाव आहे. ती गावामध्ये आई-वडील, ३ भाऊ, ३ बहिणी यांच्यासह राहत होती. शेतमजुरी करून तडवी परिवार उदरनिर्वाह करीत होता.(केसीएन) दरम्यान शनिवारी दि. २१ जून रोजी सकाळी नेहमीप्रमाणे तडवी परिवार आपल्या कामाला लागला. सकाळी ८ वाजेच्या सुमारास यास्मिन ही शेताला लागून असलेल्या घरातील कपडे धुवून झाल्यावर वाढवण्यासाठी अंगणातल्या दोरीजवळ गेली होती. तेथे कपडे वाळत घालत असताना अचानक एका नागाने तिला दंश केल्यामुळे ती खाली कोसळली.

कुटुंबीयांना समजताच त्यांनी तात्काळ यास्मिनला जळगाव येथील शासकीय वैद्यकीय महाविद्यालय व रुग्णालयात उपचारासाठी दाखल केले. मात्र वैद्यकीय अधिकाऱ्यांनी तपासून तिला मृत घोषित केले. यावेळी कुटुंबीयांनी मन हेलावणारा आक्रोश केला.(केसीएन)दरम्यान, १३ वर्षीय बालकेच्या आकस्मिक मृत्यूमुळे लासगावात शोककळा पसरली आहे. घटनेबद्दल संबंधित पोलीस स्टेशनला अकस्मात मृत्यूची नोंद करण्यात आली आहे.