गुरांच्या अवैध वाहतुकीवर पोलिसांची कारवाई
एरंडोल (प्रतिनिधी) – येथे धरणगाव महामार्गावर पोलिसांनी पेट्रोल पंपाच्या बाजूस असलेल्या मंगल कार्यालयापुढे २० हजार रूपये किमतीच्या ४ बैलांची अवैध वाहतुक करणारे मालवाहतूक वाहन पकडले. हि कारवाई २० जून रोजी मंगळवारी सकाळी करण्यात आली. दरम्यान, हे बैल पारोळा तालुक्यातील उंदीरखेडा शिवारातून चोरून आणल्याचे निष्पन्न झाले आहे.
महिंद्रा पिकअप वाहन क्र. एम.एच.४८ टी.३२१३ क्रमांकाचे वाहन जप्त करण्यात आले आहे. त्यातून ४ मावी जातीच्या बैलांना निर्दयीपणे दोरांच्या सहाय्याने बांधून कत्तलिसाठी नेण्याच्या उद्देशाने धरणगावकडे जात असताना मिळून आले. यावेळी महामार्गावर नाकाबंदीला असलेले पोलिस कर्मचारी प्रशांत पाटील यांनी सदरील वाहनास रंगेहाथ पकडले. याबाबत एरंडोल पोलीस स्टेशनला प्राणीक्लेश प्रतीबंधक कायदाप्रमाणे गुन्हा दाखल करण्यात आला आहे. पोलिस निरीक्षक सतीश गोराडे यांच्या मार्गदर्शनाखाली हेड कॉन्स्टेबल राजेश पाटील व संदीप पाटील हे पुढील तपास करीत आहेत.
दरम्यान, हे बैल पारोळा तालुक्यातील उंदीरखेडा शिवारातून चोरल्याचे निष्पन्न झाले आहे. तेथील नाना पूना पाटील या शेतकऱ्याने बैलजोडी हरवल्याची तक्रार पारोळा पोलिसात दिली आहे. तर त्याच शिवारातील आणखी एका शेतकऱ्याचे हे बैल असल्याची माहिती मिळाली आहे.
