रावेर वनविभागाची तांदळवाडी गावाजवळ कारवाई
रावेर (प्रतिनिधी) : वनविभागाने पुन्हा सावदयाजवळ विनापरवाना सागवान वाहतूक करणाऱ्या वाहनावर कारवाई केली आहे. दि.२७ रोजी रात्री ११ वाजेच्या सुमारास वनपरिक्षेत्र अधिकारी रावेर यांना मिळालेल्या गुप्त बातमीनुसार सावदा ते तांदळवाडी रस्त्याने गस्त करीत असताना मौजे तांदळवाडी गावाजवळ महिंद्रा कंपनीची बोलेरो पिकप संशयास्पद आढळून आली.
त्या वाहनाचा पाठलाग सदर टीमने केला. वाहन क्रमांक (एमएच ०४ जीएफ ७२६३) ची तपासणी केली असता त्यात २५ साग इमारती नगांचा माल आढळून आला. मालाविषयी वाहन चालक युवराज सिताराम तायडे यांना मालाविषयी लागणाऱ्या परवान्याची विचारणा केली असता त्यांच्याकडे कुठलाही परवाना नसल्याचे सांगितले. सदर सागवान इमारती मालाचे मोजमाप रावेर आगार डेपो येथे वाहन चौकशी दरम्यान घेण्यात आले.
सदर मालाची किंमत ४३ हजार ११६ रुपये असून ताब्यात घेतलेल्या महिंद्रा कंपनीच्या पिकप गाडीची किंमत अदमासे ३ लाख ४५ हजार आहे. सदर गाडीतील सागवान इमारती लाकूड व वाहनाची एकूण किंमत ३ लाख ८८ हजार ११६ एवढी असून सदरील वाहन व त्यामधील सागवान इमारती लाकूड अवैधरित्या वाहतूक करताना रंगेहाथ पकडल्याने भारतीय वन अधिनियम कलमांचे उल्लंघन झाल्याने गुन्हा जारी केला. तसेच पुढील चौकशी कामे सदर वाहनआगार डेपो रावेर या ठिकाणी जमा करण्यात आले आहे.
सदरची कारवाई ही जमीर शेख उपवन संरक्षक, यावल वन विभाग जळगाव, आर.आर.सदगीर विभागीय वन अधिकारी (दक्षता) धुळे तसेच प्रथमेश हडपे सहाय्यक वनसंरक्षक, चोपडा व समाधान पाटील, सहायक वन संरक्षक यांच्या मार्गदर्शनाखाली सदरची कारवाई ही वनपरिक्षेत्र अधिकारी अजय नारायण बावणे, आगार रक्षक सुपडू सपकाळे, जुनोना वनरक्षक जगदीश जगदाळे, वाहन चालक विनोद पाटील तसेच विशेष पेसा वनरक्षक रावेर रेंज यांच्या पथकाने केली.
