जळगावातील रामानंदनगर पोलीस स्टेशनला गुन्हा दाखल
जळगाव (प्रतिनिधी) : शहरातील रामानंदनगर पोलीस स्टेशनच्या हद्दीतील एका परिसरात राहणाऱ्या विवाहितेवर गेल्या दोन वर्षापासून संशयित आरोपी हा लैंगिक अत्याचार करीत होता. अखेर विवाहितेच्या फिर्यादीवरून रामानंदनगर पोलीस स्टेशनला गुन्हा दाखल करण्यात आला आहे.
शहरातील एका परिसरात राहणाऱ्या ३२ वर्षीय विवाहितेची सोशल मीडियावरून नंदुरबार येथील दीपक देवानंद टाक याच्याशी ओळख झाली. महिलेचा पती पॅरेलेसिससारख्या आजारामुळे घरीच असल्याने त्याचा त्याने गैरफायदा घेतला. त्यावरून त्याने जळगावात येऊन सदर महिलेशी जवळीक साधली. त्यानंतर सुमारे दोन वर्षांपासून ते आज पावतो वेळोवेळी महिलेशी शारीरिक संबंध ठेवले.
महिलेने संशयित आरोपीस नकार दिल्यानंतर त्याने आपले प्रेम संबंध आहेत याबाबत सगळ्यांना सांगून टाकेन अशी धमकी दिली. तसेच फिर्यादीच्या मुलाला जीवे ठार मारण्याची धमकी दिली. तसेच मारहाण करून शिवीगाळ करीत पैशांची मागणी केली. यामुळे अखेर त्या विवाहितेने रामानंदनगर पोलीस स्टेशन गाठून फिर्याद दाखल केली आहे. तपास पोलीस निरीक्षक शिल्पा पाटील या करीत आहेत.
