चोपडा तालुक्यातील घटना
चोपडा (प्रतिनिधी): चोपडा तालुक्यातील एका परिसरातून एक अत्यंत धक्कादायक घटना समोर आली आहे. एका १६ वर्षीय अल्पवयीन मुलीला लग्नाचे आमिष दाखवून तिच्यावर अत्याचार केल्याची घटना घडली असून, या अत्याचारामुळे पीडित मुलगी गर्भवती राहिली आणि तिने एका बाळाला जन्म दिला आहे. याप्रकरणी चोपडा ग्रामीण पोलीस ठाण्यात आरोपीविरुद्ध गुन्हा दाखल करण्यात आला आहे.
आरोपी दीपक प्रकाश भिल (रा. भवाळे, ता. चोपडा) याची पीडित मुलीशी दोन वर्षांपूर्वी ओळख झाली होती. ओळखीचा फायदा घेत आरोपीने पीडितेशी जवळीक साधली आणि तिला लग्नाचे आमिष दाखवले. सुमारे दीड वर्षांपूर्वी, संशयित आरोपीने पीडितेचे तिच्या पालकांच्या ताब्यातून अपहरण करून नाल्याजवळ नेले. तिथे तिच्या असहायतेचा फायदा घेत तिच्यावर शारीरिक संबंध प्रस्थापित केले.
या अत्याचारामुळे पीडित मुलगी गर्भवती राहिली. तिने पाच महिन्यांची गर्भवती असताना आरोपीला याबद्दल माहिती दिली, मात्र आरोपीने तिला जबाबदारी झटकत दाद दिली नाही. अखेर, दि. २४ फेब्रुवारी २०२६ रोजी पीडित अल्पवयीन मुलीने आपल्या राहत्या घरी एका गोंडस मुलाला जन्म दिला. हा प्रकार उघडकीस आल्यानंतर परिसरात खळबळ उडाली आहे.
या गंभीर घटनेची दखल घेत, महिला पोलीस उपनिरीक्षक कविता ठाणगे (नेमणूक अमळनेर पोलीस स्टेशन) यांनी पीडितेचा जबाब नोंदवून घेतला. या जबाबाच्या आधारे चोपडा ग्रामीण पोलीस ठाण्यात आरोपी दीपक भिल याच्याविरुद्ध गुन्हा दाखल करण्यात आला आहे.
आरोपीवर न्हा दाखल करण्यात आला आहे. या प्रकरणाचा पुढील तपास चोपडा ग्रामीण पोलीस स्टेशनचे सपोनि शेषराव नितनवरे करत आहेत. सध्या आरोपीला अटक करण्यात आलेली नसून पोलीस त्याचा शोध घेत आहेत.
