तिघांविरुद्ध पोक्सोसह विविध कलमान्वये गुन्हा दाखल
पाचोरा (प्रतिनिधी): येथील काकणबर्डे परिसर आणि अंतुर्ली रोडवरील शेतात एका १७ वर्षीय अल्पवयीन मुलीवर फोटो व्हायरल करण्याची धमकी देऊन सामूहिक बलात्कार केल्याची धक्कादायक घटना उघडकीस आली आहे. याप्रकरणी पाचोरा पोलीस ठाण्यात तीन नराधमांविरुद्ध गुन्हा दाखल करण्यात आला असून, दोन आरोपींना पोलिसांनी अटक केली आहे.
पीडित मुलगी ही १७ वर्षांची असून ती शिक्षण घेत आहे. मे २०२५ पासून ते नोव्हेंबर २०२५ या कालावधीत संशयित आरोपी पवन संजय परदेशी आणि प्रथमेश पाटील (दोघे रा. पाचोरा) यांनी संगनमत करून पीडितेचे फोटो व्हायरल करण्याची धमकी दिली. ही धमकी देऊन त्यांनी पीडितेवर वेळोवेळी बळजबरीने अत्याचार (बलात्कार) केला. तसेच, तिसरा आरोपी विकी शिवाजी राजपूत याने पीडितेचा वेळोवेळी पाठलाग करून तिचा विनयभंग केला व तिच्याशी गैरवर्तन करण्याचा प्रयत्न केला.
पीडितेने दिलेल्या फिर्यादीवरून २१ जानेवारी रोजी दुपारी ४:४८ वाजता पाचोरा पोलीस ठाण्यात गुन्हा दाखल करण्यात आला आहे. गुन्ह्याचे गांभीर्य ओळखून पोलिसांनी तातडीने चक्र फिरवत आरोपींविरुद्ध कारवाई केली. पवन संजय परदेशी (वय २८), प्रथमेश पाटील हे अटकेत आहेत. तिसऱ्याचा शोध सुरू आहे.
उपविभागीय पोलीस अधिकारी बापू रोहोम यांच्या मार्गदर्शनाखाली पोलीस निरीक्षक राहुलकुमार दत्तात्रय पवार आणि तपास अंमलदार पोलीस उपनिरीक्षक योगेश गणगे या प्रकरणाचा पुढील तपास करत आहेत. या घटनेमुळे पाचोरा शहरात खळबळ उडाली असून महिला व मुलींच्या सुरक्षेचा प्रश्न पुन्हा ऐरणीवर आला आहे.
