जळगाव तालुक्यातील शिरसोली येथील घटना
जळगाव (प्रतिनिधी) : तालुक्यातील शिरसोली प्र. बो. येथील इसमाने कर्जबाजाराला कंटाळून आत्महत्या केल्याची घटना गुरुवारी २९ जून रोजी संध्याकाळी ७ वाजेच्या सुमारास उघडकीस आली आहे. एमआयडीसी पोलीस स्टेशनला अकस्मात मृत्यूची नोंद करण्याचे काम सुरू होते.
संजय हरी पाटील (वय ४०, रा. शिरसोली प्र. बो. ता.जळगाव) असे मयत इसमाचे नाव आहे. तो शिरसोली येथे आई, वडील, पत्नी, एक मुलगा, एक मुलगी, तीन भाऊ यांच्यासह राहतो. त्याने कौटुंबिक कारणासाठी पैसे घेतले असल्याने कर्जबाजारी झालेला होता. त्याच नैराश्यामध्ये तो होता.
गुरुवारी २९ रोजी संध्याकाळी ७ वाजता शिरसोली येथील स्मशानभूमीच्या पत्र्याच्या शेडमधील लोखंडी अँगलला शर्टाच्या साहाय्याने गळफास घेऊन त्याने आत्महत्या केली. पोलीस पाटील शरद पाटील, श्रीकृष्ण बारी तसेच नागरिकांनी माहिती मिळताच त्यांनी त्याला शासकीय वैद्यकीय महाविद्यालय व रुग्णालय, जळगाव येथे उपचारासाठी आणले असता तेथे वैद्यकीय अधिकाऱ्यांनी त्यास मयत घोषित केले.
यानंतर कुटुंबीयांनी एकाच आक्रोश केला. दरम्यान एमआयडीसी पोलीस स्टेशनला अकस्मात मृत्यूची नोंद घेण्याचे काम सुरू होते. वर्दळीच्या ठिकाणी असलेल्या स्मशानभूमीत संध्याकाळच्या वेळी इसमाने गळफास घेतल्यामुळे शिरसोली गावात खळबळ उडाली आहे.
