जळगाव तालुक्यातील असोदा येथील घटना
जळगाव ( प्रतिनिधी ) – तालुक्यातील असोदा येथे एका तरुणाने गळफास घेऊन आत्महत्या केल्याची धक्कादायक घटना शनिवार दि. ६ रोजी दुपारी ५ वाजेच्या सुमारास उघडकीस आली आहे. जळगाव तालुका पोलीस स्टेशनला अकस्मात मृत्यूची नोंद करण्यात आली आहे.
सागर मधुकर चौधरी (वय २२, रा. असोदा ता.जळगाव) असे मयत तरुणाचे नाव आहे. तो पत्नी, एक मुलगा यांच्यासह असोदा येथे राहत होता. तर सागरचे आई-वडील नाशिक येथे राहतात.(केसीएन)सागर हा किराणा दुकान चालवून परिवाराचा उदरनिर्वाह करीत होता. दरम्यान शनिवार दि. ६ सप्टेंबर रोजी दुपारी ३ ते ५ वाजेच्या दरम्यान त्याने राहत्या घरी गळफास घेऊन आत्महत्या केल्याची घटना घडली.
कुटुंबीयांना समजताच त्यांनी शासकीय वैद्यकीय महाविद्यालय व रुग्णालयात ग्रामस्थांच्या मदतीने दाखल केले. तेथे वैद्यकीय अधिकाऱ्यांनी तपासून सागरला मयत घोषित केले. या वेळेला कुटुंबीयांनी मन हेलावणारा आक्रोश केला. घटनेप्रकरणी असोदा गावात शोककळा पसरली आहे. तर आत्महत्याचे कारण समजू शकले नाही. जळगाव तालुका पोलीस स्टेशनला अकस्मात मृत्यूची नोंद करण्यात आली आहे.
