जळगाव शहरातील शिवाजीनगर परिसरातील धक्कादायक घटना
जळगाव (प्रतिनिधी) : शहरांमध्ये अपघातांची संख्या प्रचंड वाढली आहे. शनिवारी सकाळी सव्वा दहाच्या सुमारास भीषण अपघात होऊन तरुणाचा मृत्यू झाल्यानंतर काही तास उलटत नाही तोच पुन्हा एकदा रात्री ८ वाजेनंतर भरधाव जाणाऱ्या व बेफाम बुलेट चालकाने शतपावलीसाठी बाहेर पडलेल्या इसमाला जबर धडक दिली. त्यात डोक्याला मार लागल्याने इसमाचा जागीच मृत्यू झाला आहे. शहर पोलीस स्टेशनला गुन्हा दाखल करण्याचे काम सुरू होते.
सिकंदर दिलावर पठाण (वय ५६, रा. शिवाजी नगर, जळगाव) असे मयत इसमाचे नाव आहे. त्यांच्या पश्चात आई, पत्नी, २ मुले, २ भाऊ असा परिवार आहे. ते सेंट्रींग तसेच ट्रक ड्रायव्हर म्हणून काम करत उदरनिर्वाह करीत होते. (केसीएन)शनिवारी दि. २५ जानेवारी रोजी संध्याकाळी जेवण करून शतपावली करण्यासाठी ते बाहेर पडले असता काही अंतरावर भरधाव आलेल्या बुलेटस्वारकाने त्यांना मागून जबर धडक दिली. या धडकेत सिकंदर पठाण यांच्या डोक्याला जबर मार लागून ते जागीच गतप्राण झाले.
भरधाव बुलेट पुढे एका रिक्षाला धडकली. बुलेट (एम एच १९ ई एन ६७८०) वरील चालक तरुणाला रिक्षातील नागरिकांनी पकडुन पोलिसांना बोलाविले. सिकंदर पठाण यांना शासकीय वैद्यकीय महाविद्यालयात दाखल करण्यात आले आहे. कुटुंबियांना समजताच त्यांनी रुग्णालयात येऊन एकच आक्रोश केला. घटनेबद्दल रात्री उशिरापर्यंत जळगाव शहर पोलीस स्टेशनला गुन्हा दाखल करण्याचे काम सुरू होते.
