जळगाव जिल्ह्यातील पारोळा शहरातील थरार
पारोळा (प्रतिनिधी) :- पारोळ्यातून एक धक्कादायक घटना समोर आली आहे. येथील वाकड्या पुलाजवळ३५ ते ४० वयाच्या अनोळखी महिलेने जाळून घेत आत्महत्या केल्याची घटना घडली आहे. पारोळा पोलीस सदर महिलेची ओळख पटविण्याचा प्रयत्न करीत असून हि महिला सुशिक्षित घरातील असल्याची प्राथमिक माहिती आहे.
पारोळा कजगाव रस्त्यावरील वाकड्या पुलाखाली एका अज्ञात महिलेने वय अंदाजे ३५ ते ४० वर्ष स्वतःच्या अंगावर पेट्रोल टाकून जाळून घेतल्याने मृत्यू झाल्याची घटना मंगळवारी १३ फेब्रुवारी रोजी संध्याकाळी पाच वाजेच्या सुमारास उघडकीस आली. पारोळा पोलिसांनी या महिलेची ओळख पटविण्याचे आवाहन केले आहे. याबाबत आज साडेचार वाजेच्या सुमारास बिसलेरी बॉटल मध्ये पेट्रोल भरून आणून वाकड्या पुलाजवळ भोसले पोल्ट्री फार्मच्या शेजारी स्वतःच्या अंगावर टाकून दगडावर बसून जाळून घेत आत्महत्या केली. तिच्या अंगावर लाल कलरची साडी वेगवेगळे ठिपके असलेली, गळ्यात मंगळसूत्र, पायात चप्पल अशी सुशिक्षित घराण्यातील महिला असल्याचे प्रत्यक्षदर्शी दिसून आले.
पारोळा पोलीस स्टेशनला प्राथमिक अकस्मात मृत्यूची नोंद करण्यात आली असून पुढील तपास पोलीस निरीक्षक सुनील पवार हे करीत आहे. घटनास्थळी पोलीस निरीक्षक सुनील पवार, पोलीस उपनिरीक्षक गंभीर शिंदे, किशोर भोई व कर्मचारी यांनी पंचनामा केला. सदर महिलेने आणलेली पेट्रोलची बाटली तसेच कपड्याचे नमुने व चप्पल ताब्यात घेतले असून पुढील तपास पारोळा पोलिस करीत आहेत.
