अमळनेर तालुक्यात घडली ‘सैराट’ प्रेमकहाणी
अमळनेर (प्रतिनिधी) : तालुक्यातील एक अल्पवयीन मुलीला पळवून नेऊन कोल्हापूर जिल्ह्यात संसार थाटणाऱ्या मांडळ येथील तरुणाला मारवड पोलिसांनी अटक केली आहे. मुलीच्या जबाबावरून मुलाविरुद्ध पोस्को कायद्यानुसार गुन्हा दाखल करण्यात आला आहे. संशयित आरोपीला तीन दिवसांची पोलीस कोठडी सुनावण्यात आली आहे.
अमळनेर तालुक्यातील एक अल्पवयीन मुलगी ही बसने शिक्षणासाठी अमळनेर ये-जा करीत होती. अशात तिची ओळख तालुक्यातील दिपू जगदीश पाटील या तरुणाशी झाली. त्यांचे दोघांचे प्रेम जुळले. नंतर जून महिन्यात मुलीला भावाने रागविले. त्यानंतर मुलाने या मुलीला पळवून नेले. सुरुवातीला अमळनेरहून चोपडा येथे, तेथून जळगाव येथे गेले. दोन्ही ठिकाणी खोली भाड्याने घेऊन राहिले होते. (केसीएन)नंतर नागपूरमार्गे हैद्राबाद येथे गेले. तेथे २ दिवस मजुरीकाम मिळते का याचा दीपक पाटील याने शोध घेतला. कामाचा तेथून तैरूपाल येथेही शोध घेतला. नंतर कोल्हापूरला रेल्वेने आले. तेथे नागाव येथे एका शेतकऱ्याकडे शेतात काम मिळाले. तसेच राहण्यासाठी खोली मिळाली. तेथेच राहून दोघेही शेतात काम करू लागले. त्याठिकाणी दोघांमध्ये पती पत्नी प्रमाणे शारीरिक संबंध झाले.
दुसरीकडे, मुलीच्या वडिलांनी हरवल्याची नोंद केली होती. पोलिसांनी तांत्रिक यंत्रणा वापरून मुलाचा पाठलाग सुरूच ठेवला होता. सहायक पोलीस निरीक्षक जीभाऊ पाटील यांच्या मार्गदर्शनाखाली हेडकॉन्स्टेबल सुनील तेली व सचिन निकम यांनी सैराट प्रेमी युगुलाचा शोध घेतला.(केसीएन) कोल्हापूर जिल्हयातील शिरोली एमआयडीसी पोलिसांच्या मदतीने या प्रेमीयुगुलला ताब्यात घेऊन मारवड येथे आणण्यात आले. मुलीने दिलेल्या जबाबवरून दिपू विरुद्ध गुन्हा नोंदविण्यात आला असून आरोपीला ३ दिवसांची पोलीस कोठडी सुनावण्यात आली आहे. मुलीची वैद्यकीय तपासणी करून तिला जळगाव येथे महिला बाल सुधारगृहात रवाना करण्यात आले आहे.
