पारोळा तालुक्यात घटना उघडकीस
पारोळा ( प्रतिनिधी ) – तालुक्यातील ग्रामीण भागातील एका १३ वर्षीय अल्पवयीन मुलीचा बालविवाह लावून दिला. नंतर तिला गर्भवती केल्याप्रकरणी सासर व माहेरकडील सहा जणांविरुद्ध पारोळा पोलीस स्टेशनला गुन्हा दाखल करण्यात आला आहे.
पीडित मुलीने पोलिसांना दिलेल्या माहितीनुसार, मागीलवर्षी अल्पवयीन असतानादेखील वडिलांनी पारोळा तालुक्यात ग्रामीण भागातील एका तरुणाशी जबरदस्तीने लग्न लावून दिले. त्यानंतर तिच्या पतीने अल्पवयीन असतानादेखील वेळोवेळी शारीरिक संबंध ठेवल्याने ही मुलगी गर्भवती झाली. तिला पोटात त्रास झाल्याने सरकारी दवाखान्यात दाखल केले असता दि. ७ रोजी तिने एका मुलीला जन्म दिला. अल्पवयात लग्न लावून तरुणीस गर्भवती करून बालकाला जन्म दिल्याने ही बाब येथील सरकारी दवाखान्यातील डॉक्टरांनी उघडकीस आणली.याप्रकरणी सासर व माहेरकडील सहाजणांविरुद्ध गुन्हा दाखल करण्यात आला आहे.
